由得你死
2014/12/16 09:34:24
網誌分類: 經濟
油價跌跌不休，股市亦無運行。睇嚟國際油價唔見底，股市仍然受到拖累。美股上日再跌，昨日朝早彈一彈，但油價續跌，跌到每桶55美元水平，加上美國公布的製造業及營建商信心數據唔靚仔，美股好快就掉頭向下，中午由升轉跌，杜指收市倒跌100點至17181點；標普500指數跌13點，收報1990點；納指跌48點，收報4605點。
有報道指阿聯酋石油部長蘇海勒(Suhail Al-Mazrouei)上周日對彭博社表示，未有確定特定的油價目標，認為油價將在對於供求雙方都公平的水平穩定下來，又話不能夠在每次油價下跌時候都去減産。市場最關心嘅係油價會跌到幾多至會見底？德國商業銀行分析師指出，大家可以從蘇海勒話石油輸出國組織(OPEC) 可以接受油價下跌到每桶40美元的前景，可以確信OPEC已經預期油價會發展到什麼地步。睇嚟我上篇文章提到油價可能會跌到35美元，未必無可能。
國際油價由今年6月開始下跌，至今已經暴跌超過四成至5年低位。油價跌得咁快咁勁，已經逼到石油及汽油公司縮減明年嘅投資計劃。例如ConocoPhillips已經表示，明年會削減兩成的投資資出；BP更表示在未來幾個月會裁員同取消部份工程。
阿聯酋石油部長蘇海勒否認放手讓油價下跌與打擊美國頁岩油氣行業有關，不過，美國頁岩油氣業已經受到重創，美國發展頁岩氣最興旺的兩大州：德州(Texas)及北達科他州(North Dakota)，11月遞交鑽探新油井的申請較10月份大跌三成。另外，Hercules Offshore宣布將裁掉在墨西哥灣工程的324名人員，約佔了該公司6份之一人手。在奧克拉何馬州，原油業者收入已經下降，11月份能源稅收較去年下跌5%，係幾兩年首次下降。而阿拉斯加已經預計明年財政年度將因為油價下跌而損失接近20億美元的稅收。
路透社表示，美國四個主要產油地區，包括德州、奧克拉何馬州、路易斯安那州(Louisiana)及新墨西哥州10月份經濟增長已經落後於美國其他地區，已經步向經濟放緩的邊緣。
油價咁跌法，產油大國俄羅斯中曬招，昨日在美國市早段，俄國股市插8%，在這個月前些時俄股已跌了25%，插完再插。油價從高位跌咗40%，各方懷疑俄國那裏有錢買入口貨，因為佢係大入口國，從肉食到電腦到汽車，乜都係入口，而俄國出口有33%是原油，21%是石油產品，14%是天然氣，即係有68%同能源有關，你話死唔死? 盧布暴跌13%，俄國央行為阻止油價暴跌，意外地大幅加息，由10.5厘上調到17%。
亦有唔少分析指今次油價急插，唔止俄國死，亦可能係美國經濟的一隻「黑天鵝」。而Elevation Partners的創辦人之一Roger McNamee昨日上CNBC節目時提醒投資者，由於美股估值已經好高、全球經濟動蕩，加上油價大跌，依家唔係入市的時候，叫大家唔好「喺屠夫要做煙肉嘅時候，走去做水糟邊嘅豬！」
不過，有「債券之王」之稱嘅格羅斯(BillGross) 又唔係睇得咁悲觀，佢接受彭博專訪時表示，近幾周的油價暴跌，帶來通縮，可能使聯儲局在加息方面的立場更加「鴿派」。聯儲局今晚召開一連兩日嘅議息會議，要睇吓佢在聲明內會唔會維持低利率「相當長一段時間」的措辭啦。
我就唔認為油價下跌對美國影響咁大，係會影響能源股，影響油公司債價，但蔓延性有限，足以被消費者因油價跌而提震的消費情緒抵銷。俄國已現金融風暴，但只要不如1998年那樣燒到美國的大對沖基金和銀行，美國只是掩住咀笑，由得你死。所以油價跌不是壞事。
陸羽仁
回應(5) 我想回應
陸羽仁 BLOG 舊文
