防美收水
2014年12月16日
美股上周末大跌，香港班股燦又要食驚風散，擔心中美股市升就無份賺，跌就有份蝕，「好彩」係大市一開已插到低位，之後無再有明顯拋售，最後跌咗二百零點收市，主要因為內地拗腰升番0.5%，港股就算係跌少咗啦。
今年港股的交易日已經開始進入倒數，餘下的日子不能有太高期望，一來因為基金臨尾收工，唔敢博得太盡；再者港股今年缺乏表現，就算炒高多少都好難有分紅，不如留番下年再博。相反，就怕個市有淡倉未平，未食淡友未收夠籌。
淡友唔係省油的燈
講開大戶做淡，有中環茶友話，唔知淡友係咪諗住趁佔領運動開番鋪大，於是累積淡倉，點知除咗9月28日警察放催淚彈叫做場面激啲之外，後來警方同示威者都比較克制，無搞出一場大龍鳳，跟住中央仲減埋息谷經濟，搞到造淡者食唔到大茶飯。昨日連銅鑼灣都清埋場，佔領運動係街頭無晒固定陣地，想趁政治市炒落暫時都無機會。
不過，造淡班大戶都唔係省油的燈，佢哋係咁撳住個市，佔中要跌，佔中清場又唔升，焗住等到美股跌為止。
港股昨日低開後最多跌393點，低見22856點。A股午後掉頭回升，港股大部份時間在兩萬三關穿梭。恒生指數最終收報23027點，跌221點；國企指數收報11212點，跌23點，成交縮減至686億元。聯通(762) 旗下網絡分公司副總經理兼網絡建設部總經理張智江，涉嫌嚴重違紀正受調查，聯通被拋售，跌幅是藍籌最大，收報10.2元，挫3.96%。
內地市場繼續炒作「一路一帶」大計，部份內地上市基建股升停板，本港上市基建股亦炒上。中冶(601618)A股升停板，H股(1618) 造2.45元，揚6.06%；中交建A股(601800)漲停板，H股(1800) 只係升2.4%，「漏氣」情況繼續。另外，新加坡傳媒報道，已停牌的中鐵建(1186) 同南車青島等四方組成的財團，可能獲得吉隆坡至新加坡高鐵總投資約850億港元的合約。
社科院關注熱錢流向
大戶造淡除了本地因素，都同全球熱錢流向有關。社科院發表的《經濟藍皮書》指出，隨着美國經濟逐漸好轉，今年熱錢出現了撤離新興市場的趨勢，相信香港都受呢股大氣候影響。
報告指，中國跨境資金由淨流入轉為淨流出，加上人民幣雙向波動下，內地自第二季以來出現資本項目淨流出。第三季以來中國貿易順差屢創新高，外匯儲備則再度下跌。
不過，《藍皮書》認為，內地外匯儲備規模龐大、資本項目未完全放開，以致資本流對內地金融市場未有帶來大衝擊。雖然係咁，中國應加強跨境資金流動監測，防止熱錢大規模流出，有效防範美國退出量寬對中國帶來的衝擊。
香港股市的深度同成熟程度，嚴格來說唔止係新興市場級數，但由於香港有唔少內地股份掛牌，加上同美元掛鈎而又無資金管制，所以每逢有熱錢流出亞洲，香港都會成為櫃員機，被大鱷提款。
今個星期美國聯儲局可能會就未來利率政策有所表示，主席耶倫可能會改變長期維持超低利率的說法，屆時可能會再牽動熱錢回流美國，成為空軍唔肯隨便投降的原因。
雅居樂(3383) 主席陳卓林恢復職務，股價午後飆逾一成，收市報4.51元，升咗11.1%。近日有幾間內房股傳出主席或大股東的負面的消息，搞到股價大跌，相關債券孳息仲去到十幾厘，反映投資呢類公司真係要膽博膽。
陸羽仁
金融High Tea 舊文
