阿爺出口托
2015/01/20 08:33:47
網誌分類: 經濟
昨日係馬丁路德金紀念日，美國假期，股市休市一天，都係大陸市大跌精彩。歐洲股市在市場對歐洲央行將泵水救市的預期升溫下，第三日收高，昨日一度觸及7年高位，認真威威。
相反，中港股市就悽慘啦，在中國證監會宣佈處罰包括中信證券、海通證券和國泰君安等三大違反融券融資業務規定的券商後，令到券商股、保險股全線跌到全部停板，連累整個金融板塊，上證綜指暴跌7.7%，創了逾六年半最大單日跌幅。如果無停板制度，估計大市跌幅仲會更慘烈，恆指尚算好啲，全日跌1.5%，國企股就慘啦，雖然尾市反彈，收市仍要大跌超過600點。
中國證監會出手打違法孖展，明顯係想為升得太顛的股市降降溫，但一跌又跌得甘勁，阿爺又驚啦，中國證監會新聞發言人鄧舸昨日又急急補鑊解話，主要兩點，第一，唔認中證監罰券商是「監管部門聯合打壓股市」，話只是例行檢查。第二，對證券公司已經違規俾50萬資產以下的客戶開戶口借孖展，不要求強行平倉，券商「切實做好風險提示和客戶服務」就得啦。阿爺一見大跌就怕，出口托市。
其實在中證監出手前，中銀監已出了手發佈商業銀行委託貸款管理辦法(徵求意見稿)，擬對銀行委託貸款嚴格管理，禁止銀行將委託貸款的錢借去俾人炒股，不過當時市場無大反應，直至中證監鬱到孖展貸款才大跌。中證監、中銀監密集出手，是先控制一下股市，然後才讓央行再放水，是有部署行為。
若然阿爺管一管股市為放水舖路，個市跌得多佢又咁心急補鑊，我就覺得唔使太驚，跌市反而係低吸機會，不過要有心理準備預佢再跌，頂得順至好買，或者分段買。
講到低吸紅色股，昨日睇到MarketWatch一篇投資技巧嘅文章，幾有趣，不妨同大家分享一下。呢篇文章唔係請撈底，而係講撈「渣」。
文章指作者統計去年個別美股升跌，反現一個頗為有趣的現象。2014年標普500指數表現威威，全年有14%進賬，不過，據FactSet資料顯示，計埋股息再投資，2014年年初，華爾街分析師們評價最低嘅10支股票，全年平均有19%的回報率。即係話，最「渣」嘅股票，仲跑贏標普500指數5個百份點！文章列出去年評級最低10隻股票，其中包括金屬公司美國鋁業、能源公司Excelon，以及運輸公司C.H. Robinson Worldwide。這三隻股票的年回報率都達到或超過30%。事實上，名單上的股票只有約翰迪爾蝕賠了，但都係微蝕1%。
那麼，分析師最得最嘅頭十隻股票，表現又點呢？總體而言，表現更加出色，回報率22.7%，不過，值得留意嘅係，之所以造得咁好，全靠其中兩隻股票，達美航空同醫學設備公司Covidien，分別勁升超過80%及超過50%。其他嘅8隻就唔後幾得，其中有四隻仲要蝕錢。即係話除非買曬，否則中唔中要揀股。
咁會唔會係分析師去年有咁啱得咁橋大跌眼鏡呀？作者收統計數據擴展到7年，發現撈「渣」得米唔係偶然。分析師最不看好的股票整體表現既明顯好於大市，甚至明顯好于分析師們最看好的股票。資料顯示，由2008年年初開始，假設在那時投資標普500指數基金10萬美元，股息自動再投資，到了今天，資產規模達到了大約17萬美元，獲利70%，成績著實唔錯，如果每年年初專買分析師最看好的十隻股票，年底賣出，新年再買入新的最睇好嘅股票，到今天，表現略好過指數基金，資產規模接近18萬美元，即獲利大約80%。不過，如果每年都投資最唔睇好嘅十隻股票，資產規模達到27萬美元，即係有127%嘅進賬。比大市多近1倍的收益！
講穿咗，其實道理好簡單。當所有分析師都睇唔好某隻股票的時候，呢隻股票冇人肯買，價格往往都會跌得好低殘，會有非常可觀折扣，大市唔升，無得講，一旦係向上市，獲利嘅比率就高好多啦。這是一個人棄我取的方法，人驚我買，可以參考，但記往佢講的是大股，唔係3、4、5線股份。
陸羽仁
回應(2) 我想回應
陸羽仁 BLOG 舊文
