魚樂無窮：博燒冷灶揀莊士泛海
■本周踏入業績高峯，滙控、友邦、長和系將陸續派成績表。 資料圖片
羊年第一次同大家見面，先祝戰友們旗開得勝、炒咩都贏！
歐豬希臘同歐元區財長達成協議，財政援助延長四個月，成為羊年股市第一個好消息，美股更率先響頭炮，道指標指齊創新高。救命錢到咗，外圍動盪暫可舒緩，股市有炒作本錢。
香港呢邊，本周踏入業績高峯，滙控（005）、友邦（1299）、長和系將陸續派成績表，勢將主導指數表現，中細價股業績更加要睇實，全年一注獨贏股隨時誕生，有好嘢再同大家分享。
A股周三先復市，不過馬年成功食尾糊，連升七日收爐，兩會三月即將舉行，又係憧憬兩會行情嘅時候，羊年有望承接馬年強勢。事實上，經濟數據唔掂，仲有通縮風險，放水變得理所當然，每一次調整都係撈貨良機，內銀內險A股ETF繼續係首選。
大折讓地產股鱷魚恤（122）早排宣佈，大股東林建名正洽售股權，消息帶動股價四日升1.2倍。按圖索驥，莊士機構（367）同埋泛海國際（129）值得扒冷。
兩間公司大股東同樣持貨逾五成，有賣盤條件。莊士機構及泛海國際每股NAV分別為4.5及11.2元，較股價0.97及1.77元分別折讓78%及84%。嘩！睇見都流口水。如果呢轉冷灶燒得起，升幅肯定唔會比鱷魚恤細，值得小注儲貨。
唐牛
https://www.facebook.com/tongcow88
唐牛
魚樂無窮 - 唐牛 舊文
