魚樂無窮：港交所唔該睇住個場
■中化肥近期頻頻搞收購。圖為集團主席劉德樹。 資料圖片
昂納光通信（877）星期一出盈喜，預計多賺三倍，有傳媒幫佢計數，全年盈利應為五千三百四十八萬，點知公司第二日就澄清，原來盈利係上年度同期嘅三倍，即係增長只有兩倍而非三倍。作為上市公司，咁簡單嘅數學題都錯，固然要打pat pat，但噚日跌咗半成，計過數入場嘅戰友，邊個幫佢哋找數呢？監管機構成日叫人投資要做功課，而家咁樣無辜輸錢，負責把關嘅港交所（388），唔該跟進嚇囉！
發洩完，講今日推介中化肥（297）。二○一三年度喪蝕4.76億元（人民幣．下同），舊年上半年轉賺1.38億元，大翻身格局已成。回帶去到二零一一年，又係turnaround之年，當年全年賺5.36億元，股價高見4.7港元。保守估計，舊年下半年盈利持平，全年可賺2.76億，為當年約五成。股價呢？昨收報1.79港元，即係當年嘅四成都唔夠，有水位炒也！事實上，作為內地最大化肥供應商及分銷服務商，中化肥近期頻頻搞收購，包括中化雲龍及向母公司增持青海鹽湖，有做大做強之勢，未來數年等收成。
券商美銀美林最新給予中化肥目標價兩元，潛在升幅12%，亦剛好係圓底頸線阻力，呢兩日股價轉強，相信達標無難度，如果業績有驚喜，可挑戰二○一三年高位2.17港元，但屆時連NAV價都未到呀陰公！
唐牛
https://www.facebook.com/tongcow88
唐牛
魚樂無窮 - 唐牛 舊文
