中環在線：萬邦股東撐彤叔
唔少係銀髮族 揸幾十年
■萬邦每年開股東會都有一班老股東捧場，其中徐伯伯（箭嘴示）後生嗰陣買咗幾千股萬邦。 梁靖然攝
香港有超過一千七百間上市公司，要講最老資格嘅一間，新世界發展（017）創辦人鄭裕彤（彤叔）有份嘅萬邦投資（158）肯定係其中之一。萬邦董事會八名董事嘅平均年齡有七十五歲，年紀最大係創辦人之一嘅鍾明輝，九十有四。唔少小股東亦已經係銀髮族，揸咗呢隻股份幾十年。
■原來好多小股東都掛住彤叔。 資料圖片 成功連任董事
萬邦上星期五喺中環翠亨邨舉行一年一度股東會，跟往年一樣，一大班銀髮小股東齊齊去到捧場。執行董事兼主席鄭裕彤自二○一二年九月入院後，已經連續第三年冇現身，華華問過幾位老股東，佢哋揸咗萬邦幾十年，不約而同咁話有少少掛住彤叔。
徐伯伯話當年自己好欣賞彤叔，幾十年前後生嗰陣，佢喺中環做看更嗰陣，曾經見過彤叔幾面，佢欣賞彤叔做生意叻，份人又夠老實，於是佢就決定將慳慳埋埋啲錢，用嚟買咗幾千股萬邦，佢買嗰陣，萬邦股價都仲係十幾蚊咋。
嘩嘩嘩，萬邦股價過去五年嘭嘭聲咁升，上周五收市報139.5元，雖然萬邦交投疏落到不得了，要買賣都唔算容易，但相信徐伯揸住幾千股，見到賬面賺咁多都好開心喇。
而且，呢隻股派息相當好，過去五年都派逾四蚊，淨係過去三年，每年每股派息4.6元，假設徐伯揸住三千股，每年都袋超過萬三蚊股息。難怪徐伯都話「梗係唔放喇，啲息咁好，夠我飲好多餐茶呀。」
呢班小股東亦真係真心支持彤叔，呢日股東會，其中一個議程係重選彤叔做董事，根據年報，萬邦舊年開過四次董事會，彤叔全部冇到，但係一班股東完全唔介意，繼續投票支持彤叔，令彤叔差唔多獲百份百票數支持，成功連任。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
