魚樂無窮：一隻殼味漸濃半新股
■半新股Mega Expo上周五創新高。圖為集團主席李志生。 資料圖片
唐牛之前估過有機會賣盤嘅夜場股Magnum（2080），上周五發通告指，控股股東葉茂林正與潛在買家商討出售所持69.1%股份。簡單計計數，最新市值3.6億銀，手頭現金1.3億銀，以殼價五億計，依然有水位可炒，用招股價1.5元做短線目標，回報都唔錯。
不過，Magnum上市初期喪炒過一輪，一度高見3.21元，樓上蟹貨不在少數，未必能一氣呵成砌上；相反，如果搵到有潛質賣殼又處於高位嘅股份，炒起上嚟肯定更得心應手，半新股Mega Expo（1360）上周五創新高，種種跡象顯示，公司已走上賣殼之路，極有可能成為Magnum翻版！
Mega Expo主打展覽會及配套服務，二○一三年十一月上市，但舊年八月即發盈警，同Magnum情況如出一轍，疑似為賣盤鋪路。就係上市滿一年、即股權可易手嘅敏感時刻，突然配售四千萬股，集資五千五百萬銀，但公司手頭現金達1.35億銀，兼且零負債，完全冇現金需要，配股必另有所圖。睇番最新股權架構，大股東持股攤薄至58.3%，係咪新主唔想吞咁大批貨？自己諗諗吧。
Mega Expo最新市值4.2億銀，當中約兩億係cash，上番殼價講緊起碼升一倍，上周五突然大成交破位，唔通好似Magnum咁，係春江鴨所為？
唐牛
https://www.facebook.com/tongcow88
唐牛
魚樂無窮 - 唐牛 舊文
