炒兩會變主題
2015年02月27日
內地人民銀行主理的刊物，連續兩日刊登文章談及中國通縮風險，指要適度調整利率應對通縮可能性，令市場對人行減息的預期升溫，刺激內地股市止跌回升。與此同時，市場開始炒作人大政協兩會消息，中資基建股變得熱鬧，大市成交有輕微增加，似乎股民開始做定炒作熱身準備。
A股羊年復市無神無氣，我覺得內地有咗期指可以炒兩邊之後，出現呢種狀況好正常，好多散戶做咗好倉等過年開紅盤，大戶過年後復市第一日隊一隊，先清一清好倉。殺好友之後，雖然未見具體好消息，個市又無厘頭升番上去，散戶都係天生俾人玩㗎啦。好似隻萬科(2202) 咁，前日無情情隊約3個巴仙，昨日又彈番4%，你話點解？
無論點講，市場都係等緊中央出招，借啲意又升番上去，昨日滬市高位曾觸及3300點，最終以近全日高位收市。上證指數收報3298點，漲69點；深成指收報11750點，漲211點。兩市成交5980億元人民幣。各板塊以金融股反彈較明顯，證券股平均急升6.6%，內地多間銀行獲批定向降準，銀行股平均升2.7%。
中資金融股動身
A股突然發力，帶挈港股造好，恒生指數收報24902點，升123點；國企指數收報12227點，升1.35%，反映焦點集中番係國企股之上，大市成交增至827億元。
假期之後，長實(001) 公佈去年底止全年業績，股東應佔盈利539億元，按年增長52.8%，每股基本盈利23.26元，派第二次中期息3.016元，集團預料2015年售樓相對2014年將有較好進展。和黃(013) 同期股東應佔盈利671.56億元，按年增長115%，比市場預期好，每股基本盈利15.75元，派第二次中期息1.755元。
長和系成績表唔差，特別和黃業績仲好，但市場市場焦點相信落在改組多過業績之上。對於有對沖基金同小股東話和黃換股價偏低，管理層就擺出老定姿態，話如果方案唔通過，就下次再想辦法，唔知係咪因為呢個原因，和黃股價昨日就追唔上長實。
龍頭地產股今日輪到新地(016) 派中期成績表，證券商普遍預計，期內租金收入繼續保持增長，但由於較少物業銷售入帳，估計其中期核心純利介乎90.99億元至101.8億元，按年跌4%至15%。如果以家樓市狀況，發展商賣樓利潤相當唔錯，關鍵係呢種旺市可以維持到幾耐？
財政預算案暫時唔使地產商食辣招，心理上對樓市同地產股有利，借住業績公佈期，會唔會炒番一轉呢？有中環茶友笑言，若然唔係現屆政府上場，加強辣招同增加土地供應，令到炒家窒住窒住，住宅樓市可能一早已經失控，瘋狂炒到爆煲，家因為有唔同招數，結果樓價升得慢咗，所以捱到家都未爆，加上辣招將購買力由二手樓趕去一手樓，令到新樓雖然供應增加，仍然唔使劈價賣樓，令發展商因禍得福，呢個結果完全係意料之外。
有得揀何必揀地產股？
茶友之言好有馬後炮的味道，說到底，住宅樓價愈升愈有，同低息和全球印鈔關係最直接，其他只係輔助因素，關鍵係咁貴嘅樓價，仲可以維持到幾時？又或者可以再升幾多？雖然財爺無出招，我仲有少少擔心金管局會出招收緊按揭，所以對地產股仍有保留，炒佢哋不如炒吓國策股，基建又好，環保又好，呢啲股符合兩會主題，至少可以炒番一兩星期，何必去炒地產股？
就算真係地產股死忠擁躉，都係收租股好啲。最近，部份樓市投資者，開始將眼光放番寫字樓物業，佢哋估計中國加強走出去，對本地商用物業需求會增加，但過去幾年新落成的寫字樓唔係咁多，特別係中環金鐘一帶的甲級商廈，所以開始睇好擁有優質寫字樓的股份好似太地(1972) 、鷹君(041) 等，認為呢幾隻收租股有機會跑贏賣樓股。
陸羽仁
金融High Tea 舊文
