魚樂無窮：兩隻半新股殊途同歸
■恒寶企業市值3.4億元，潛力十足。圖為集團主席鄭立言。 資料圖片
不經不覺，中原城市領先指數（CCL）已高見138.8，樓價今年暫時再升4%，破頂成交無日無之，相信有樓同冇樓嘅，對樓市已經麻木曬︰有樓嘅自住唔會賣，心中富有；冇樓嘅上車由理想變夢想，心中只有粗口。用異常瘋狂形容而家嘅樓市，一啲都唔誇張，家陣上車盤動輒四球，無論從首期抑或供款角度出發，一個正常打工仔根本負擔唔起，除非你有一個做護士嘅老婆囉。
股市近期同樓市有一個共通點，就係越細越癲。舉個例，上星期五十大升幅榜中，市值全部廿億樓下，十億樓下更超過一半。道理好簡單，錢就係得咁多，你話舞起一隻十億市值股份易，抑或一百億市值股份易？塘水滾塘魚下，呢個畸形趨勢相信會持續一段長時間。
除咗市值要夠細，貨源歸邊都好重要，所謂貨疏價必揚，半新股往往可以將呢個優勢，發揮得淋漓盡致。今日一口氣推介兩隻，同樣潛力十足。第一隻，恒寶企業（1367），勝在夠細，3.4億市值，兩大股東揸七成半，舊年中上市，差不多夠鐘賣殼，剛好突破下降軌，有力再上層樓。第二隻，蘇創燃氣（1430），上星期三上市，B組客中籤率四成，但依然守穩招股價，證明唔係短炒，有心做大事，市盈率十一倍，平過市面嘅同業估值一半，炒番上招股價上限2.92元，都有四成水位。
唐牛
https://www.facebook.com/tongcow88
唐牛
魚樂無窮 - 唐牛 舊文
