中環在線：趙國雄囝囝搵女友
樓神二代結婚先買樓
■趙朗搵女友應該冇難度。 陳東陽攝
長實（001）樓神趙國雄一女一仔已經工作多年，大女趙宇喺置富產業信託（778）做行政總裁，比較低調，阿仔趙朗（Ronald）舊年就憑拆售銅鑼灣羅素街八號而喺地產基金界爆紅。佢跟爸爸一樣咁健談，噚日仲自爆，諗住積極搵女友，等到想結婚嗰陣，兩個人一齊儲錢先買樓喎。
廿八歲嘅趙朗五年前加入里昂證券，現為里昂證券房地產基金投資董事，成名作應該係佢舊年以十八億元買入銅鑼灣羅素街八號全幢，然後拆售，為基金帶來十六億元賬面盈利。
■大女趙宇（左）同趙國雄成個餅印咁。 資料圖片 希望阿仔女友是中國人
佢評論樓市似佢爸爸一樣咁信心十足，口吻就同趙國雄老闆、超人李嘉誠差唔多，都係話買樓自住幾時都可以買，但要量力而為。
佢又順便寸一寸平日成日評論樓市嘅人，指「佢哋分析得嘅話，都唔係乜嘢因素，佢哋出得嚟講嘅嘢，都已經反映咗喺樓價入面喇」。
雖然佢認為買磚頭最實際，但佢暫時就冇呢個打算，原因係乜？佢貴為趙樓神嘅寶貝仔，又係金融才俊，當然唔係好似普羅大眾咁，因為未儲夠首期喇。佢竟然好老土咁話，要等到想結婚先買樓，𠵱家要搵女朋友先喎。
咁啱趙國雄噚日喺另一個場合出現，佢知道阿仔想搵女友，就講明「希望（阿仔女友）係中國人，呢樣最緊要！」咁如果係男朋友呢（Hehe）？樓神即刻好大反應話「咁又唔得喎，我個人好開通嘅，不過有啲嘢未接受得到！」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
