中環在線：機管局三高層係舊手足
新大公關邱松鶴 做過貿發局
■右起：蘇澤光、林天福同邱松鶴，原來都喺貿發局做過。 資料圖片
機管局前公關阿頭李雪珊舊年七月拜拜，相隔半年，機管局先搵到人做大公關，由市區重建局前企業傳訊總監邱松鶴（Lawrence）替佢個位。特別嘅係，Lawrence去市建局之前，喺貿發局工作十年，計埋行政總裁（CEO）林天福同埋今年中過去做主席嘅蘇澤光，佢哋三位可以搞個貿發局舊同事re-union喎。
機管局前行政總裁（CEO）許漢忠原本喺港龍航空工作多年，佢過咗去機管局之後，成日俾人話佢搵埋好多港龍舊下屬加入機管局做管理。𠵱家佢走咗，由貿發局前CEO林天福替佢個位，跟手就有個貿發局前公關過埋去，呢種隻帶隻嘅情況係咪又重演緊呢？
蘇澤光六月接掌機管局
Lawrence噚日都話，轉工時有考慮過呢一點，不過最後都係決定接受新挑戰。佢一九九七年加入貿發局，林天福後來先至加入，佢話實際上只係同林天福共事一年左右，二○○七年佢就過檔市建局嘞。
上月先正式返工嘅Lawrence𠵱家努力「溫書」中，佢話要刨熟三本有關機場危機處理程序嘅書，每本有成兩吋厚，認真唔講得笑咁話。
不過話時話，𠵱家公營機構係咪真係咁難搵人呢？搵來搵去都係似曾相識或者似乎有些少關係嘅人。淨係講機管局，許漢忠一早話走，政府一路話未搵到人，舊年五月，政府宣佈委任現任貿發局主席蘇澤光，今年中去做機管局主席，冇耐機管局就話搵到林天福去做CEO！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
