魚樂無窮：特步國策概念打孖上
■習近平熱愛運動，上場後不止一次提出全民體育。 資料圖片
國家主席習近平熱愛運動，上場後不止一次提出全民體育，佢更加係標準足球迷，外訪時周不時露兩腳，最近仲同英國威廉王子大談波經。習總亦唔係得把口，近年不斷推出體育相關政策——國務院去年底發佈加快體育產業、促進體育消費的若幹意見，預計到2025年，產業規模將達5萬億人仔；近日更出台《中國足球改革總體方案》，講到以申辦世界盃為目標。
上述兩大國策，講緊數以萬億嘅商機，芸芸體育股用品當中，邊隻概念最好？唐牛認為特步國際（1368）最值博。點解咁講？事關安踏（2020）、李寧（2331）等，全部主打籃球用品，特步就強攻跑步同埋足球，無論從競爭抑或概念上，都贏在起跑線。全國共50個專業馬拉松賽事，特步已贊助當中嘅三分之一，香港最受歡迎嘅渣馬，都係佢哋贊助，夠曬江湖地位。足球方面，除西甲維拉利爾外，更冠名贊助全國性校園足球聯賽，與習總嘅足球夢不謀而合。雖然去年盈利倒退兩成，但毛利率已回升，近期公佈嘅訂貨會及同店銷售亦有升幅，低谷相信已過。
由於股價跌足大半年，特步投資價值已浮現。現價市盈率8.8倍，較安踏及361度（李寧蝕錢）平均12.9倍折讓32%，市賬率0.9倍，更較三者平均2.1倍平逾一半，加上息率接近七厘，冠絕同業，呢個水位買定貨等收成，點秤都值博。
唐牛
https://www.facebook.com/tongcow88
唐牛
魚樂無窮 - 唐牛 舊文
