中環在線：人緣好 同事買920元蛋糕慶生
財爺生日 fb千人like
■曾俊華（右三）切蛋糕前跟同事合照，然後放上fb是常識吧。
噚日係財爺曾俊華64歲牛一，原來佢跟英女皇伊利沙伯二世同月同日生日，英女皇就慶祝89歲生日。財爺嘅辦公室同事夾份送咗個4磅大蛋糕同佢慶祝，跟手喺傍晚將兩
張相放上facebook（fb），5粒鐘內獲得合共接近千個like，可見財爺人緣幾咁好呢。
■生日牌上面有兩撇鬍鬚，襯番財爺「鬍鬚曾」嘅花名。 
■噚日都係英女皇伊利沙伯二世89歲生日。 金牛座穩重又幽默
一般人食蛋糕多數都係芒果、芝士、朱古力之類，財爺嘅口味都幾特別，佢鍾意生果蛋糕，嚴格嚟講，應該係一個特大生果批。聞說，佢辦公室10幾位同事過去5年，都係幫襯金鐘某間五星級酒店嘅餅店，訂同一款蛋糕，呢個4磅蛋糕就賣920元。其實錢事少，最緊要大家高興。
財爺4月21日生日，即係屬於金牛座，根據網上資料，金牛座嘅人，性格似牛，處世相當慎重，經常笑容滿面，唔愛管閒事，屬於相當高明嘅社交高手，而且為人幽默、風趣，經常能夠得到朋友嘅青睞。唔怪得財爺前年被人錯手掟中雞蛋，佢都可以即時以一句「醫生叫我唔好食咁多蛋」咁輕鬆回應喇。
咁究竟財爺今年有乜生日願望呢？講出嚟就唔靈嘅，不過華華估計，佢應該至少有一個願望，就係下次唔好再估錯市。事關星期日日頭佢出網誌，估計丁蟹效應可能令周一股市「裂口低開」，點知當日傍晚阿爺出手放水，刺激港股高開低收，搞到財爺完全估錯曬，希望佢下次估得近磅啲喇。生日快樂呀，薯片叔叔。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
