一周三件：宏橋食大茶飯
■中國宏橋食住全球交通基建輕質量化，主打鋁產品應該有優勢。 互聯網
中國宏橋（1378）食住全球交通基建輕質量化，主打鋁產品應該係肥仔水，而家陣得超低4倍嘅PE，唔怪得北水透過港股通，起勢密密地吸納，博食大茶飯。
宏橋主打液態鋁合金、鋁合金錠，同埋鋁合金鑄軋產
銷。先睇嚇大環境，據中汽協數據，製造汽車用鋁代鋼，整架車嘅重量，可以減少30%，而耗油量亦可以減省30%，汽車業包括大哥大寶馬、通用等，已經增加使用鋁材，而美國亦推出全鋁汽車產品。
北水一路加緊倉
唔單止在汽車瓣數，家陣就連城軌、航空，以及內地嘅電網，都加深採用包括鋁嘅輕質材料。原因真係好簡單，輕質量化符合環保節能嘅大原則，兼且已經成咗個勢！
而全球龍頭美國鋁業（美Alcoa）就預計，今年全球鋁嘅需求量，會增加6.5%。唔計一帶一路呢個新增靚仔嘅因素，宏橋單係食住呢個全球環保大趨勢，喺嚟緊嘅日子，主打瓣數真係掂過碌蔗。
場內專業評估，宏橋明年EPS1.41元，現價（6蚊）嘅預測PE，得4.2倍。上邊美國鋁業明年預測11倍PE，又祖國行家南山鋁業（滬600219）炒一帶一路同製造輕質化，半年就翻咗一番，明年PE上到29.4倍、利源精製（深002501）半年一樣翻咗一番，明年28倍PE。宏橋PE，係平咗大大截！
又根據港交所（388）網站中央結算嘅紀錄，北水透過港股通買宏橋，係一路加緊倉，由上周一紀錄9,598萬股，去到本周一嘅1.07億股。喺祖國行家20、30倍PE基數底下，與其博中有難度嘅再翻一番，上到50、60倍PE，北水醒目資金不如南下買宏橋，博翻一番到10蚊樓上計數，宏橋明年預測PE，都仲係得勁低8倍PE，勝算係好高多。
錢雋
細價股專家
本欄逢周二、三、五刊出
錢雋
一周三件 - 錢雋 舊文
