中環在線：九倉電訊新任代言人
Mandy Lieu出局 謝安琪頂上
■謝安琪被大讚有正能量。 沈健程攝
九倉（004）旗下九倉電訊舊年用名模Mandy Lieu做代言人兼拍廣告，諗住搵靚女推銷點都有吸引力，點知好多人睇完個廣告，都係唔知九倉電訊賣乜，咁啱Mandy泊到好碼頭，最近要
專心湊B，九倉噚日就宣佈，改用「高登女神」謝安琪（Kay）做代言人嘞。
Mandy Lieu與人夫洗米華愛得高調，近日更有雜誌指佢已為對方誕下B女。九倉電訊總裁馬惟善噚日宣佈新宣傳計劃時，冇評論係咪因為Mandy Lieu形象轉差而唔續約，只係比較行貨咁話，Kay係公司嘅適合代言人選，讚Kay有正能量，歌唱與彈琴都好叻，可以配合公司宣傳策略。
九倉電訊發言人又補充，指過去每位代言人都係簽約一年。適逢今年係公司成立廿周年，就選用Kay代言拍新廣告，想推雲端服務。
■Mandy Lieu之前九倉電訊輯廣告，被評為「唔知賣乜」。 互聯網 
■馬惟善希望廣告順便吸埋內地客。 張志華攝 唱國語歌吸內地客
特別嘅係，Kay喺廣告入面係唱國語歌，似乎跟九倉電訊集中經營本地市場唔多夾。馬惟善解釋，Kay唱國語歌「美麗動聽好好聽」，效果較好，如果有內地客被廣告吸引而成為客仔，就更好喇。
公司已經成立20年，佢當然希望客戶人數與市場佔有率繼續增加。至於會否順應股東建議，將九倉電訊注入同系有線寬頻（1097），佢又係行貨咁答「會喺適當時間考慮」囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
