中環在線：星展莊希 永亨吳幗欣
兩靚女賓架扒龍舟
■星展莊希（左）同永亨吳幗欣都係扒龍舟好手。
呢個星期六就係端午節，端午節兩大活動當然係食糭同扒龍舟，印象中，扒龍舟係一項「力的表現」嘅運動，參賽者位位操練到手瓜起𦟌，男士居多，但原來銀行界有兩位靚女賓架係龍舟好手，分別係星展香港區
零售銀行業務及財富管理營運總監莊希與華僑永亨信用財務總經理吳幗欣。
擁有健康膚色嘅莊希，有6年龍舟競賽經驗，雖然今年升咗職，唔只負責產品發展，要兼顧更多範疇，工作量有增無減，但係都無阻佢參加龍舟比賽。
莊希周六參賽
佢上月底有份參加新加坡嘅賽事，奪得季軍，本周六參加赤柱國際龍舟錦標賽，要企上頒獎台應該冇難度。
據聞，莊希每星期都孖住星展香港及中國內地科技及營運總監林大衛（David Lynch）去赤柱練龍舟，十分勤力。扒龍舟需要運用臂力與腰力，龍舟健兒都要做好多體能訓練，莊希與林大衛練船前，一定要做鍛煉臂力嘅熱身，莊希亦真係操得好弗。
除咗莊希之外，銀行界仲有位龍舟好手，之唔係外表嬌滴滴嘅吳幗欣囉。佢同莊希有兩個共通點，就係兩位都有一身陽光膚色，而且笑容都好甜美，唔通做運動真係令人變得更有魅力？
吳幗欣確係龍舟愛好者，起碼落場玩過3年，參與過本港與內地嘅大小龍舟比賽，只可惜近年要兼顧工作與家庭，已經有一段時間冇玩，之但係，佢一直有做運動keep住有番咁上下體能。聞說，佢最近開始心思思想復出扒龍舟，今年就可能趕急咗少少，希望明年可以見到佢再喺龍舟上展英姿喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
