唔怕壞消息 至怕不明朗
2015年06月18日
美國聯儲局議息，對息口走向隨時會有啟示，同一時間政改方案開始呈上立法會。有中環茶友笑言，呢兩件事好似兩把劍吊喺港股頭上，究竟係篤落嚟定係唔篤落嚟，無論點呢兩日都會有結果，就算好定壞都叫做暫告一段落。茶友笑言，有商界大孖沙同佢講，美國睇落
點都要加息，咁長痛不如短痛，快快手手開始加息仲好過。
跌後反彈 成交未上
呢種唔怕壞消息，至怕不明朗嘅理論，唔知有幾大代表性。不過，港股喺政改辯論開始後就升多咗，同政改無關，主要係內地股市昨日V形反彈，轉跌為升，帶動番個香港個市。
恒生指數收造26753點，升187點；國企指數收報13414點，升161點，成交輕微縮減至1208億元，動力明顯未夠，只是反彈，不是升市。
指數造好，連續兩日捱沽的中車(1766) 股價終於有反彈，一度重上12元關，收造11.9元，急升7.8%；旗下南車時代電氣(3898) 回升5%，中車急彈也帶挈一眾鐵路基建股回勇，正如我喺網誌講，中車跌得咁多，技術上有投機博反彈的可能，但同佢下挫幅度比，回升唔算好多，買來投資就要小心忍忍手。
吹笛唱衰中車得手的摩根士丹利，與美銀美林齊齊下調長城汽車(2333) 目標價，搞到長汽沽壓明顯，收造40.55元，挫1.9元或4.5%，為表現最差國企指數成份股。
阿里無綫搞自拍劇
講完衰嘢講好嘢，阿里數碼娛樂事業群總裁劉春寧透露，該公司計劃成立中國版的HBO，推出Tmall Box Office，為內地6億個家庭提供娛樂內容，部份節目內容自行製作，部份從海外購入。阿里將會跟電視廣播(511) 聯手製作迎合內地觀眾口味的電視劇及電影，雙方的合作細節將於未來3個月公佈。
阿里巴巴馬雲點子多多，呢一招線上影視公司搞自拍劇，似足美國線上影視巨頭Netflix，佢搞自拍劇《紙牌屋》非常成功，呢類公司唔可以只靠播人家二手劇，要自己拍嘢突圍，馬雲同電影界行埋，都係諗呢個方向。暫時未知呢一瓣關唔關阿里影業(1060) 事，但佢有理無理升4.7%，收3.35元。
呢排細價股瘋炒概念收斂，雖然每日仍有不少二、三線股上升，但升幅無以前咁癲，而且多數係回歸基本因素。好似昨日做電器生產嘅利民(229) ，就傳出「股壇長毛」David Webb入股消息，股價跑贏大市。
跟住股壇長毛有辣有唔辣
股壇長毛買股曾經係刺激股價上升的靈丹，但近年效應減退，主要係大家發覺佢唔係隻隻股都得，特別係股市好旺的日子，佢持有的股份可能仲跑得慢啲，因為好多炒家覺得有條「中戶」手頭有貨，無謂走出搞佢啦，跟佢買股好處係佢識得分析公司，質素唔會太離譜。至於佢成日出來幫你維權，就一半一半啦，因為好多大股東會覺得佢搞搞震，一於同佢鍊過，好似多年前佢反對王氏港建(532) 私有化，到今日股價都未返去佢搞喎時的價錢，所以跟佢買股要有慢慢熬的心理準備，最好係等股價回番，買得平過佢。
佢今次入股的利民實業(229) ，主要業務是製造及銷售家用電器，現價市盈率有成20倍，但派息有6厘，價貴但高息。股壇長毛於6月9日，增持了52萬股，每股作價1.072元，總值56萬元，持股量增至5.03%。消息公佈後，收造1.32元，升近15%。小心高追中伏呀。
另一隻近日升勢唔錯嘅股份係安全貨倉(237) ，公司確認近期有代理接觸，提出數個收購旗下附屬公司柴灣貨倉的無法律約束力的收購建議，管理層未作出任何決定。安全倉資產豐厚，名下物業價值同租金都有上升潛力，現價派息就麻麻。呢類老股有無表現主要係睇會唔會賣產同有無派息動作，如果講營運能力，當然係藍籌地產股勝一籌啦。
陸羽仁
金融High Tea 舊文
