中環在線：四叔外孫女有食神眷顧
兩人都有行運癦
■李敬恩（左）同外公李兆基臉上都有粒癦；右為李佩雯。
大家一講到恒地（012）主席李兆基（四叔）嘅孫仔，通常只係諗到李家傑與李家誠嘅年幼子女，好少提到四叔長女李佩雯，其實李佩雯嘅女兒李敬恩（Kristine）都25歲，兩年前已經加入恒地
幫手，呢位外孫女跟公公有一個相同特徵，就係面上明顯有粒癦㗎！
聞說四叔呢位外孫女Kristine係高材生，4年前喺美國史丹福大學畢業，跟好多富二、三代一樣，佢畢業後返港，先去一間外資投資銀行工作兩年，然後先至返去恒地幫手。
任租務部助理總經理
李佩雯管理恒地租務部，Kristine順理成章去咗租務部跟媽媽學習，佢目前嘅職銜係租務部助理總經理，主要負責所有投資物業嘅品牌重塑工程。
華華從一堆舊照片中搵到Kristine與媽媽嘅合照，赫然發現Kristine與四叔一樣，臉上明顯有粒癦。四叔右眼眉毛前端有粒癦，Kristine就嘴唇上面有癦。
根據風水師麥玲玲所講，Kristine呢粒癦叫做「食癦」，有呢粒癦嘅人成日有人請佢食好嘢，無端端行過都可能被人捉住話要請佢食飯；咁有食神，當然就要留意腸胃健康喇。而四叔嗰粒癦生喺眉毛附近，就好似禾稈冚珍珠，代表好有財運。
公公有財運，外孫女有食神，其實都好啱數吖。
先唔講坊間食肆，淨係恒地旗下公司都有投資多間食肆，好似四叔飯堂──中環國金軒，Kristine日日去食都大滿足喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
