中環在線：全功能視像櫃員機首登場
有真人回覆 設於富邦灣仔分行
■視像櫃員機設於灣仔分行；圖為富邦香港執行副總裁葉嘉敏。
銀行界又有新玩意嘞，富邦銀行早前翻新灣仔分行，新增一個全港首創全功能嘅視像櫃員機（i-Teller），可以提錢存款，仲有位職員透過屏幕提供查詢服務。之不過，既
然去到分行可以搵真人幫手，點解要對住個屏幕呢？中環人嘅感覺都麻麻哋。
陸叔：好少落分行
剛離開渣打嘅「小飛俠」林燕玲（Ruby）聽到i-Teller，劈頭第一句就問：「同普通ATM有乜分別？」其實佢除咗現金提存，仲做到好多查詢服務，例如查詢滙率、息率，都有人即時答覆，理論上較為貼心。但Ruby話，𠵱家已經好少去銀行分行，通常使用網上銀行，所以呢，視像櫃員機與真人，對佢冇乜分別。
獨立股評人陳永陸（陸叔）貪得意，最初就話出咗會試嚇，過嚇癮，但諗多陣，佢發覺自己已經好少落分行，好少用ATM機，連現金都好少用，乜都係用信用卡，或者以易辦事搞掂，所以應該冇乜機會試咁話。
好多人又提到，東亞銀行（023）一早都有部i-Teller，不過東亞嗰部查詢性質居多，富邦嗰部就乜都做得，可惜富邦呢部i-Teller同銀行營業時間一樣，晚上都係冇得用。
富邦香港零售銀行部主管葉嘉敏（Carmen）話，正跟廠商NCR研究，希望銀行關門後，將佢變做一般ATM咁用，但暫時技術未得住。
至於可否24小時都有真人服務，富邦方面就話要跟金管局研究，因可能有保安問題。同埋佢話部機唔平，貴過ATM三成，但慳到成本，舖都可以租細啲。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
