捉路搵消遣
2015年11月20日
美股前晚炒上，港股高開之後無乜力，臨到尾市先彈番高啲。有中環茶友不明所以，陸羽仁覺得，港股跟美國跟得唔係咁足，主要係內地股市開頭腳軟軟，所以拖住後腿。粗俗點講，港股依家好似有兩個老頭，是但一個發惡，港股就似教育局長──唔得掂。
聯儲局公佈上月會議記錄，表面上係
多數委員支持加息，但睇真聯儲局留少少萬一有狀況可以延遲加息的後路。會上不少人擔心聯儲局會傳出錯誤訊息，令市場認為聯儲局會用一個可以度量的步伐持續加息。聯儲局成員除了爭辯如經濟持續向好可以怎樣做，也爭議若情況變壞會如何。一句話︰「聯儲局其實對持續加息相當淆底」。會議記紀錄面世後，交易員調低12月加息估計，利率期貨交易顯示12月加息機率由74%回落到68%。令美股杜指上日大升248點。
美股急升推動中港股市造好，可惜成交不足，踩咗一段油後就乏力回軟，當時內地股市同樣爭持，上證綜指微跌。不過，午後內地股市好番，上證綜指升1.4%收市，港市做番好啲，恒生指數收造22500點，升311點；國企指數收10193點，升137點。
阿爺加強財金人事管理
內地股市經過一輪反彈，近日外資開始套現，令上證綜指喺3600點上開始有點阻力。不過，中央依家不斷總結第三季A股暴跌的教訓，人大財經委副主任委員吳曉靈日前在財經年會上總結，股災發生有六大原因，一是槓桿交易過度；二是造多造空機制不均衡；三是股市缺乏在急跌時有效熔斷機制；四是新股發行制度缺陷；五是中國投資者結構不合理，散戶化傾向嚴重，追漲殺跌；六是媒體助推牛市思維，沒發揮應有作用。
吳曉靈的講話係從比較技術性層面去分析股災，但投資涉及市場機制，同時有人的因素。阿爺好明顯覺得今次爆災，暴露財金系統在人事上的缺陷。最近內地開始流傳中央要整合人行、中證監、中銀監三個監管機構，變成一個超級監管機構，仲傳可能會換證監會主席肖鋼。
今次A股急跌，之後暴力救市有點踢腳，初期連水都無，要在市場集資，真係睇到眼定定，對中國金融發展帶來衝擊。中央痛定思痛，加強監管同人事管理，係必然之事。我就估成立超級監管架構後，習大大將全面掌控金融監管體系，唔到你打自由波。
體育用品股跟住炒
大市昨日反彈，資金寧願吸納對利息無咁敏感的股票，似體育用品股表現就唔錯。安踏(2020) 創上市新高，最高見過24.45元，飆7.7%，收報24.05元，仍升6%。李寧(2331) 升4.2%，報4.19元；中動向(3818) 高2.6%，報1.98元。
體育用品股向好，都有小小路捉，睇番美國隻NIKE，月前升上133美元高位，早排隨市回落，今星期又升過，前晚佢收報125美元，升了2.6%。NIKE市盈率有31倍，息率不足1厘。內地體育用品股中表現較佳的安踏市盈率有28倍，息率有2.5厘。若計技術同管理，梗係美國公司好，但講市場，安踏就佔優，最重要係中央希望體育變成產業，即係話就算無扶持，至少無打壓，所以呢個板塊係下半年表現唔錯。
體育用品股呢一輪升咁多，短期撲入驚有摸頂風險，投資者可以留意相關的三、四線股或生產商，好似隻永嘉(3322) 、新灃(1223) ，呢類股份一、兩元有交易，細細注博贏餐茶，都可以當係上落市嘅消遣。
陸羽仁
金融High Tea 舊文
