航空股應旺不旺
2015年12月03日
踏入十二月，聖誕氣氛臨近，美國已炒緊「聖誕市」。過去有「聖誕鐘、買匯豐」之說，呢支歌仔無唱好耐。近年中環茶友鍾意放假外遊前買航空股，但佢發覺今年美元強，好多人外遊，但航空股股價卻唔係幾得，最明顯係地膽航空公司國泰(293) ，今個星期指數反彈
，佢仍然喺一年低位浮沉，昨日收報13.42元，升0.04仙，仍然離一年低位13.36元不遠。
茶友話，佢最近出巡，喺國泰個商務Lounge唞唞，見到逼人逼到爆，唔明咁好生意，油價又低，點解股價唔得？
上證拗腰 帶升港股
呢個問題講起嚟好複雜，本來油價下滑，對航空公司係好大利好因素，但國泰有搞油價對沖，攤薄了油價回落的好處，同一時間美元匯價強，歐洲、日本線收入都受匯水下跌影響。不過，最緊要係競爭大。
有大行做過調查，國泰是以香港作為根據地的航空公司，當中34%的運力未來12至18個月將直接面對內地航空公司的新航線競爭，鑑於內地旅客中轉減少，調低國泰2016及2017年客運收益率預測2%，睇淡佢股價。
最近有報道話國泰商務客位套票要大減價，差不多買一送一，相信都同競爭加劇有關。依家區內航空公司鬥劈價，故此成個航空板塊股價，喺聖誕都變了應旺不旺。
聖誕市氣氛唔強，但港股昨日受上證全日飆逾2%帶動再升。恒生指數收報22479點，漲98點；國企指數返回一萬點大關，全日收報10050點，升102點，成交792億元。
股仔KFM金德(3816) 宣佈，分派實物資產的方案被港交所(388) 否決，成為賣殼失敗個案，結果股價插水。港交所依家無話唔准賣殼，但重組就唔易過關，炒賣殼的股民真係要小心，如果有機會食胡，最好都係食住一部份先，唔好咁大貪。
金德喺今年六月份，已經簽咗備忘錄賣盤，搞咗成半年到依家先話唔掂，消息一公佈就大插。公司透露，集團進行資產重組被港交所裁決為不可行，因為交易所覺得公司於完成實物分派後，將無具備足夠業務水平或足夠資產價值可以繼續上市。不過，公司表明賣盤仍在繼續，依家諗緊有無其他計仔。
金德主要從事提供精密金屬沖壓及金屬車牀加工服務，以及製造及銷售精密金屬產品。佢喺2012年上市，之後就盈利大幅倒退，你可以懷疑公司係發水上市，但嚴格而言幾年來佢都有錢賺，唔可以話佢「啤殼」，但由於市值同規模細，要佢賣殼後有足夠上市實力都唔容易，所以話依家港交所收緊呢條規定，已經令賣殼難度大增，要成功借殼並非做唔到，但都要有好叻腦袋度條好橋先。
新股淡 大集資傳下限定價
呢輪新股排隊上市，好多散戶連名都未搞清。中地乳業(1492) 首掛牌，開報1.2元已欠承接，掉頭低見1.04元，收1.15元，較上市價1.2元，低近4%，乳業股上市大部份都破底，散戶已好多輸到怕，點解乳業股仲可以上到市，呢條係一百萬元的題目，總之依家港交所大開方便之門，新股各展神通，過到海就係神仙。
喺咁多新股上市，市場感覺麻木，集資逾百億元的大型新股中國能源建設(3996) 計劃以接近招股價範圍下限定價。外電引述消息透露，中國能建計劃以招股價範圍1.59元至1.73元接近下限定價。
睇番做電力行業全面解決方案提供商的中國能源建設，實力唔係太差，是次引入20名基礎投資者，合共認購12.65億美元(約98.67億港元)股份，佔集資額高達70%，結果都受市場冷待，只能話係新股太多的大氣候使然。中能建計劃下周四首日掛牌。
陸羽仁
金融High Tea 舊文
