成名作
德勤的全球 CEO，一夜成名。德勤即是 Deloitte，即是號稱 Big Four 嘅四大會計師行之一。
呢位 CEO，名叫 Punit Renjen。
成名時間，兩日前。
成名原因，有兩個。
第一，佢同好多其他 CEO 一樣，喺 2016 年嘅第一個月份，寫咗個 memo
畀全世界嘅同事，即係大概二十幾萬人。
第二，佢呢個 memo，畀 Financial Times 嘅資深專欄作者刊登咗出嚟，因為，呢位專欄作者話，佢未見過一個咁樣衰嘅 memo。呢位專欄作者真係咁寫：：Renjen has composed something so ugly，so empty，and so downright stupid。
聽過無數咁多次，尤其是好似馬雲都講過類似嘅話：
當你成功咗，你講句廢話，人哋都會覺得係金石良言。Deloitte 呢位 CEO 示範咗畀你睇，原來就算畀你上到位，都要慎言。不過你唔使替呢位 CEO 擔心，我寫包單，佢唔會因為呢個 memo 畀人炒，但幫佢「執」呢個memo嘅PR同事都應該凶多吉少。
昨天收到幾個朋友傳來的短訊，都是關於這個 memo 的。到底他寫了什麼？戇居的地方有好多，但我只想講最戇居的地方。如果你對呢行唔熟悉，你唔會覺得呢句說話有啲咩問題，但如果你知道呢行嘅「行情」，你都會同意呢位 CEO真係語無倫次得好緊要。
睇住，佢係話：
… join our journey to undisputed leadership…
佢叫 Deloitte 同事一齊邁向市場上無可爭辨的領導地位。
四大會計師行裏面，Deloitte 排第幾，我唔知，亦都唔會有人敢講。如果你想知呢句話有幾荒謬，不如咁，我婉轉啲打個比喻。
Deloitte CEO 話 Deloitte 有朝一日會做 Big Four 一哥，就等於李嘉誠同人講：「我哋長江將會起最好嘅樓，我哋嘅 3 網絡將會係全香港收得最好嘅網絡。」人哋拜關二哥，我拜誠哥，係崇拜個拜，所以，長實樓有幾好，網絡有幾穩，大家心照就得，我唔講出口。超人永遠唔會講啲冇可能發生嘅嘢，因為超人清楚知道自己每瓣生意嘅定位喺邊度。
個樣眉尖額窄冇嚟貴格，就最好唔好同人講你想贏港姐冠軍。Donald Trump 講過，if you are going to be thinking anyway，you might as well think big，呢啲反面教材千祈唔好信。做人，最緊要知道自己定位喺邊；作為一個 CEO，更加係發夢都要有譜。
來源 source: http://thestandnews.com
生活 - 葉朗程 舊文
