重複2015
2016/01/07 08:55:44
網誌分類: 經濟
對投資者嚟講，真係禍不單行。油價再插，拖累能源股大跌，世界銀行又下調今年全球經濟增長預測，北韓又話成功研製氫彈，歐美股市上日大跌後歇一歇，昨日又再跌過。
歐洲股市平均跌1.3%，其中德國股市跌0.9%；法國
股市跌1.3%。美股杜指開市價插穿17000點，之後反覆向下，至午後曾大跌342點至16817點，歐收市跌幅收窄至1.5%，收報16907點，下跌252點；標普500指數跌26點，收1990點，跌幅1.3%；納指跌56點至4836點，跌幅1.1%。
沙特處決什葉派傳教士，與伊朗的衝突加劇。不過，原油價格卻未有因為中東局勢不穩可能會影響供應而上升，北韓又話成功研製氫彈油價亦唔升。市場現在擔心的是沙特和伊朗唔會真刀真槍打起來，而係用油價做武器，大打石油減價戰，令到油價雪上加霜。昨日油價又再大幅下滑，紐約原油期貨大跌5.6%，跌穿每桶34美元水平，係2008年12月中以來最低。油價插，再度重創能源股，杜瓊斯能源指數昨日大跌3.6%，其中Chevron勁跌4%，再度成為表現最差的杜指成份股。
另一個拖累美股大跌的是對全球經濟前景憂慮同北韓話已成功研製氫彈，不過，分析普遍認為全球經濟唔得，對股市的影響仲大，原因係北韓話有氫彈，可能只係吹水靠嚇。不過，北韓昨日的核試同「氫彈」又真係炸爆咗人民幣匯價，「氫彈」消息出籠後，離岸人民幣兌美元暴跌800點，跌破6.72關口。市場普遍認為，地緣風險加劇，刺激資金外流避險，在亞洲去曬日圓避險，日圓見118，其他亞幣同時大出血。在中國當前動盪的經濟環境下，朝鮮的氫彈核爆實驗，無疑為經濟前經製造了一不確定因素。
另外，對於今年全球經濟前景，認真無眼睇，世界銀行昨日指基於主要的新興市場經濟增長太弱，將帶來全球經濟壓力，故下調今年全球經濟增長至2.9%。世銀所指的主要新興市場，相信係指中國。中國繼公佈奇差的12月製造業PMI之後，財新銀行與Markit Group 昨日公佈，中國12月服務業採購經理人指數(PMI) 為50.2，較上月跌了1個百份點，係17個月以來低點。高過50，意謂中國的服務業仍在擴張，但增長勢頭正在萎縮之中，又差唔多去到升跌臨界點。服務業已經係中國國民生產總值(GDP)比重最大的板塊，服務業增長放慢，又會拉經濟復甦的步伐啦。
如果睇美股為首的環球股市，新年頭三個交易，情況好差，似在預示2016年，會翻炒2015的處境。股市無力，杜瓊交通指數已是52週新低，S&P中型股指數距52週低位只有0.9%，羅素小型股指數只距低位1.5%，只有大型股好啲，標普500指數仲距52週低位6.5%。今年頭三日美股交易唔多，顯示唔係有人力沽，只不過買家唔想落手，成為輕成交下跌的股市。
美股分析員怕2016年正正在重複2015年的處境:沽商品股和全球工業股，買入(或較少人沽)大眾消費股和健康護理股。債券OK，美元幾好。呢種市好難炒。
陸羽仁
回應(0) 我想回應
陸羽仁 BLOG 舊文
來源 source: http://blogcity.me
