圓匯上演殺人事件
2016年04月29日
美國聯儲局議息聲明，唔止現在不加息，亦完全無為6月加息鋪排，被視為鴿味濃厚。但日本央行隨後議息，維持貨幣政策不變，亦未有加碼放水去推低日圓，投資者憧憬幻滅，日圓匯價一度爆升2%，引發淡倉拆倉，港股在期指結算日都大幅波動。
日本央行唔做嘢加
大量寬去壓匯價，有少少出人意表。日圓咁樣飆升法，上演一幕匯市殺人事件，估計好多炒家會喺匯市損手，亦會影響一眾有做日本生意的公司，日本貨因匯價升而難銷。至於喺股市，令人關心係公司細細新聞多多嘅CEC國際(759) 。
早排CEC國際主席林偉駿大呻生意難做，話近年運作模式和他旗下阿信屋類似的零售店不斷湧現，對手以減價戰和阿信屋競爭，生意比以往難做，日圓匯價上升，更令阿信屋成本上漲，雪上加霜。早兩日佢再放話，表明旗下阿信屋會調整定價機制，將所有貨品統一標為「公價」，並取消「正價」及「街坊價」等較低價產品，希望5月實施。連帶用嚟抽特首水的「會員689折」，都順勢取消埋。
759無運行
近呢兩年，有媒體不斷吹起阿信屋熱潮，759股價跟住就炒吓炒吓，陸羽仁就一直唔睇好呢種靠平價大舉擴張嘅模式，認為喺香港租貴、人工貴的經營環境下，做生意如果無本身賣點，大舉開舖一味靠平搶客，等如係自殺式襲擊，炸唔炸得死對手唔知，但自己就好大機會犧牲。
CEC截至去年10月的半年盈利809萬，按年跌53%，下半年日圓咁升法，佢有無利潤都唔知。咁搞法公司最值錢資產唔係檔生意，而係佢嘅殼價。CEC昨日收報1.02元，跌咗2.9%，市值跌到6.8億，市場對佢生意已經唔存厚望。
舉一反三，美國唔加息住，美元回番少少，令本地出口生意好番少少，但做入口生意的公司，就因為入口貨匯價回升，要捱吓啦。
喺日本央行大潑冷水，日圓極速走強下，恒生指數本來高開127點後升幅擴大至293點，高見21654點，但圓匯狂升令大市快速由升轉跌，一度挫106點，低見21255點，午後好淡拉鋸，恒指收報21388點，升26點，國企指數收報9060點，漲23點，成交金額678億元。
「五•一」黃金周長假將近，市場料航空客運需求旺，加上美元匯價回落，內地航空公司買飛機欠美元債多，國航(753) 因而受惠，彈升5.6%，造6.18元，為表現最叻的國企指數成份股；但國泰(293) 掉頭挫4.8%，造12.2元，是表現最曳的藍籌股，恐怕它的投資者怕油價再上。
忍者龜要爬得快
傳統藍籌板塊上上落落，第二季有炒味板塊之一係電視關連股，呢類公司多數無乜錢賺，進銳退速。有中環茶友最近就燒冷灶，話可以炒作電影概念股彩星玩具(869) 。
彩星之前公佈2015年全年業績，股東應佔溢利為2.76億港元，同比跌幅43.7%。每股基本盈利0.2284港元。公司解釋，主要係去年同期業績受惠派拉蒙的「忍者龜」重頭電影所帶動，無咗呢個利好因素，所以股價插低咗。茶友留意到，雖然佢業績唔靚仔，但股價就不跌反升，佢相信係因為今年又有「忍者龜」電影上畫。
彩星同好多玩具生產商唔同，基本上佢唔係做玩具，而係推廣玩具，「忍者龜」係佢嘅王牌，差不多已經做咗二、三年，茶友留意到咁多年佢形成一個起落循環，就係推出電影前股價炒上，推出電影後視乎票房決定去向，如果票房麻麻就插低，票房好就炒多陣。由於呢個循環有跡可尋，唔排除家已有炒「忍者龜」概念嘅人偷步。
茶友計吓數，家各大電影公司都搞超級英雄片，「忍者龜」競爭多咗，面對鉅資製作，系列電影大收機會低咗。另一方面，彩星家市值24億元，息率有4.8厘，如果要炒作電影概念，佢就比主打內地市場嘅電影股穩陣啲。
陸羽仁
金融High Tea 舊文
來源 source: http://hdfin.stheadline.com
