一周兩件：中冶的華麗轉型
■近幾年中冶成功開拓到城市建設整體規劃、設計同施工專家等範疇。 資料圖片
中國中冶（1618）單係今年頭四個月嘅新簽合約，已經過千億元人仔，食住大型基建開波，加埋中冶成功轉型，keep住有運行，得5倍預測PE，有得諗。
中冶今年第一季盈利增長7%，到近13.7
億元（人民幣·下同），過關之餘，集團啱啱公佈無耐，今年頭四個月累計新簽合約1,486億元，同比係翻咗半番。粗略計數，中冶頭四個月合約金額，已經等於上年全年新簽工程合同3,593億元嘅41%，數據睇落好靚仔。
受惠內地城市基建
仲要咁睇，近幾年，鋼材同資源瓣數唔掂檔，中冶唔係等運到，兼由冶金建設運營服務商，成功開拓到城市建設整體規劃、設計同施工專家等範疇。而上年，中冶新簽合約當中，有高達2,984億元，係嚟自非冶金瓣數，佔咗總合約83%比重。
又據中冶引述住建部，三年內，單係一個海綿城市計劃嘅投資額，講緊上870億元。睇到亦諗到，中冶呢嚇轉型，食到內地各大城市基建條水，掂過碌蔗。
場內專業評估，中冶今、明兩年EPS0.344同0.39港元，今、明兩年預測PE，再跌到得番5.98倍同5.2倍。中冶由2009年上市以嚟嘅平均PE值，講緊係9.3倍，最低係2011年時嘅4.9倍，中冶預測PE值，比平均值平咗成44%，兼貼近歷史最的低位！
中冶現價2.05港元，又比A股（滬：601618）折讓達52%。場內主打基建鐵路瓣數，H股比A股平均折讓30%水位，中冶A、H折讓，又係吸引到痹！煲中冶，中線當翻半番到3.06港元，明年預測7.8倍PE，未有耐先會上到平均值的水位。
錢雋
細價股專家
本欄逢周一、三刊出
錢雋
一周三件 - 錢雋 舊文
來源 source: http://hk.apple.nextmedia.com
