微利新常態
2016年05月24日
喺觀望美息變化下，港股成交再跌，得番只有438億元，恒指升完又跌，收報19809點，跌43點；國企指數收報8308點，升4點或0.06%。比較惹人注意，反而係體育用品股匹克(1968) 晨早就停牌，有傳將會私有化回歸內地A股上市。
其實，A股
申請上市愈嚟愈難，好多民企都加快回歸內地借殼步伐。龍頭物流公司順豐，就宣佈計劃借殼在A股上市。內地深圳上市公司鼎泰新材公佈，計劃注入順豐控股全數股權，預計涉及金額達433億元人民幣，是繼申通及圓通擬借殼A股上市後，另一間民營快遞企業透過借殼上市。市場金睛火眼昅住順豐最後搞唔搞得成，亦關心有意轉戰A股嘅內房股萬達商業(3699) 私有化回歸內地的進展。
鼎泰新材表示，擬將全部資產及負債與順豐控股100%股權的等值部份進行置換，擬置入的順豐控股100%股權預估值為448億元，鼎泰新材以發行股份方式向順豐控股股東支付，每股發行價格為10.76元，預計涉及發行39.5億股。同一時間，鼎泰新材再以不低於每股11.03元向不超過10名投資者，配售7.25億股，集資80億元，用於航材購置及飛行支持項目、冷運車輛與溫控設備採購項目、訊息服務平台建設及下一代物流訊息化技術研發項目、中轉場建設項。
順豐借殼 搵水打仗
順豐快手快腳上市，相信係睇到內地A股有拉閘情況，擔心若然錯過呢班車唔知等到幾時。家內地物流業陷入鬥燒銀紙搶客的戰國時代，強如順豐市值由過去吹到話值千億元，到而家就算係A股上都只有448億元，可見生意競爭之激烈。睇番係香港上市嘅嘉里物流(636) ，佢係2013年上市，當時招股價係10.2元，昨日收報10.72元，3年間無穿招股價已經算叻，不過，而間公司正積極想把位於港倉的貨倉搞做骨灰龕大樓，可見物流生意唔易做。
順豐若成功係A股借殼，唔排除令到競爭再升級，喺網絡時代同資金氾濫，微利經營、甚至無利經營，已係絕大部份行業的新常態，先搶市場佔有率，再講賺錢。如果企業唔能夠喺財技或資本市場諗到計，隨時就俾巨浪淹滅，呢個亦係過去長期話唔需要上市嘅順豐，咁急登陸A股嘅理由。
雖然傳匹克回歸A股，但投資者似乎都唔敢輕舉妄動，體育用品股依然受壓。特步(1368) 大插6.7%，報3.77元，李寧(2331) 跌1.6%，報3.18元。反而安踏(2020) 上周累跌逾12%後一度插穿16元，收市反彈報番16.76元，微升0.12%。體育用品股係今年表現較佳板塊，喺悶市下唔排除基金會沽貨計數，令佢哋輪流受壓。
霸王打贏 雞碎賠償
霸王國際集團(1338) 控告《壹週刊》誹謗，索償逾6.3億元案經審訊後，高等法院法官陸啟康今頒下判詞裁定壹傳媒(282) 旗下《壹週刊》誹謗罪成，須賠償300萬元，另下令《壹週刊》需支付霸王八成訟費。今次賠償額同索償數字比係九牛一毛，但霸王可以收番大筆法律費用，對市值只有11億元同埋無乜錢賺嘅霸王嚟講，叫做好過無。昨日霸王跌6%收0.395元，可見市場對雞碎咁多的賠償額相當失望。反觀壹傳媒就升2.2%收0.46元，兩間公司都係得11億市值，好有累鬥累之感。
《壹週刊》於10年7月14日刊登一篇題為「霸王致癌」的文章，內容指其生產的洗髮水內致癌物質二噁烷含量超標，霸王早前入稟高等法院，指《壹週刊》報道對霸王構成誹謗，影響公司產品銷量，造成生意劇跌，官司經過六年糾纏終於有結果。
霸王銷售喺呢次風波後持續滑落，股價隨之大跌。要留意係官司尾聲，公司喺呢個月公佈，擬向不少於六名認購人配售2.5億股認購股份，佔擴大後股本約7.91%。配售價0.31元。
淨籌7720萬元，用於償還現有股東貸款及一般營運資金，霸王去年持續經營業務有2.3億人民幣生意，靠節流令虧損減至1.11億元，看來經營環境仍然嚴峻，就算打贏官司，可以大大聲話俾人聽自己係畀人誹謗，相信都唔易扭轉劣勢。
陸羽仁
金融High Tea 舊文
來源 source: http://hdfin.stheadline.com
