深港通唔易炒
2016年05月12日
油價回穩，帶動美股回升，杜指勁彈222點，再度逼近一萬八千點水平，稍為紓緩內地經濟憂慮。不過，阿爺近日煞停中概股借殼回歸A股的措施逐步落實，據《財新網》報道，為防止企業以併購重組為名炒作概念，中證監已禁止上市公司透過向特定投資者，非公開發行股份集
資，跨行業投向涉及互聯網金融、遊戲、影視及VR虛擬實境四個行業。咁講等如唔畀呢4個行業借殼。
A股雖然勉強靠推高啲防守性股份頂住，但港股就再插過。這四個被叫停重組的行業，都係近月內地較為癲炒的行業，家阿爺出招防範炒風，對氣氛自然有影響。
港交所純利隨時再跌
喺內地控險措施出台，A股呆滯乏力下，就算美股走勢唔錯，港股都難逃一跌，恒指收報20055點，跌187點；國企指數收報8443點，跌42點；紅籌指數收報3534點，跌16點。最搶眼係半新股仔宏安地產(1243) ，勁升25.4%，收報5.82元，比招股價0.92元足足升了532%。
大市近日交投奀豬，港交所(388) 就公佈，第一季盈利14.3億港元，按年下跌9%。期內，收入及其他收益27.5億元，按年下跌2%，香港現貨市場及英國商品市場交投淡靜、衍生產品合約成交大增等都影響收入。港交所一度插低0.8%，收報185.8元，無升跌。
去年第一季，港股仲係呆呆哋，基數唔算高，但港交所去年首季收入比起今年，仍高出2%，港交所今年首季盈利因此已經跌咗9%。去年第二季，A股爆出政策牛，帶動港股價量齊升，所以去年第二季港交所業績基數已扯高。若今年第二季港股真係五窮六絕，港交所第二季和去年比較差距會相當明顯，盈利好有可能大插。
下個星期，人大委員長張德江就會訪港，特區政府打咗開口牌話會爭取深港通，若措施成功開通，或者就成為一個短期炒作因素。不過唔好忘記去年滬港通推出，初期都係水平無波，到後來先至借住A股嘅政策牛爆上，到咗今年又回歸平淡。所以，深港通呢個概念如果未炒上，喺低位就易博，如今個市已反彈咗一浸，再升少少就要小心接火棒啦。
五月話咁快過咗三分之一，今年五． 一內地客來港澳繼續淡靜，大家關心澳門博彩收益依然反彈乏力，銀河娛樂(027) 主席呂志和呢兩日「蒲頭」，大家自然追問澳門博彩收益見底未？呂志和就講得比較巧妙，話初見賭業已經平穩咗，仲話會增加其他旅遊元素，吸引遊客去澳門，銀娛股價彈咗一彈，收報24.8元，升0.8％。
陸羽仁早幾日同澳門猛人傾起，究竟博彩業見底未？猛人好老實咁講，澳門仲有幾年先傾續賭牌，邊有咁快就話會見底。啱啱實施咗係賭場唔准用手機拍攝，又被視為利淡行業嘅招數。
澳門唔准用手機在賭場拍嘢，有人理解為等同禁絕地下博彩，因為過去賭錢有枱面同枱底，枱面係一個數，有人係枱底透過拍攝提供再落注，用呢個方法落注嘅唔使講都係唔方便去澳門嘅人啦。澳門家限制用手機拍攝，有人就擔心會令到呢類枱底注碼減少，影響業內收益。不過，澳門政府做嘢，必須同阿爺配合。阿爺唔想咁多錢喺澳門流咗出去，咁澳門政府就要有嘢做，就算影響到生意都無辦法啦。
猛人話，澳門政府早前先同博彩公司講，叫佢哋增加博彩以外的收益，而且有埋指標，為咗達到指標，博彩公司除了經營賭場外，仲要諗計增加旅遊以至其他收益，呢個亦係點解呂志和話要增加其他旅遊元素的理由。澳門娛樂事業最賺錢始終係博彩，但中央出到聲，大家就要聽話。
濠賭股有反彈未見底
過去，娛樂公司收入向賭業傾側，部份公司其他收益只得幾個巴仙，就算家政府要求唔高，要提高其他收益幾個巴仙，對娛樂公司嚟講，都要放一筆投資落去。如果博彩生意好，呢啲投資梗係無乜所謂，但當毛利比較高嘅博彩生意跌緊，咁呢啲投資就百上加斤。
猛人計吓數，家雖然博彩收益下跌，但都有七、八百億元，夠澳門政府支出，就算澳門政府唔夠使，阿爺最多諗啲辦法幫佢喺其他地方搵銀，好過係咁放人落澳門輸錢。由呢個角度嚟睇，濠賭股今年以來嘅回升，好有可能只係反彈唔係見底。
陸羽仁
金融High Tea 舊文
來源 source: http://hdfin.stheadline.com
