銀行股同病相憐
2016年05月06日
五窮效應下，恒指繼續跌，但大市轉炒個別，除咗個別股仔外，有啲二、三線股突然爆上，力度都相當強勁。
昨日表現好啲嘅二、三線股，一隻係內銀股盛京銀行(2066) 。呢隻股先前陸羽仁都拆過局，點出恒大地產
(3333) 不斷增持。早前，恒大再度出手增持，之後見到股價彈上，收市報12元，升逾9%。
根據恒大早前公佈，已向盛京5名股東共購入盛京10.02億股，佔盛京於3月底已發行股本總額17.28%。總代價100.17億元(人民幣，下同)。交易完成後，恒大將持有盛京銀行27.24%權益。
恒大今次大手買入盛京前，主要喺市場吸納，呢次係向主要股東入手，顯然佢好有興趣控制呢間銀行。股價喺佢增持後攀升，相信係市場憧憬佢會再買。至於呢個估計係咪正確，只係一半一半，因為恒大持有27.24%股權，比例已經唔低，如果無其他股東出嚟挑戰，理論上恒大已經足夠控制公司，所以投資者想買佢，就要留意住恒大嘅動態，因同其他內銀股比，佢市盈率超過9倍，息率2.8厘，數字明顯差過大型國有銀行股。
恒大效應 盛京爆上
好似盛京呢個情況，可以話係特例，因為外資對內銀風險家戒心好高。日前中國銀監會主席劉明康嚟咗香港，我都有見到佢，問起內銀會唔會爆煲，佢就派定心丸，強調不太擔心內地銀行業壞帳問題。劉明康提到內地銀行業的不良貸款，在第一季升到2.1%，不良貸款率上升，有必然性，如出口下降等影響。但關鍵是兩點，第一要存款穩定，內地存戶很好，不會走。二是撥備充足，內地銀行不良貸款撥備覆蓋率150%，就可以對沖風險。他提到一季度內地銀行的不良貸款撥備覆蓋率由早前的200多%下降到174%，不良貸款率還會上升但可控。
劉明康仲提到2003年他上任後馬上找四大會計師行，做6個月壓力測試，調查內地大銀行的20、30%的信貸樣本，樣本數目極大，定出150%這個不良貸款撥備覆蓋率數字，有一定安全性。對於有兩間內地大銀行第一季的不良貸款撥備覆蓋率降到150%以下的問題。佢好技巧咁回應，內地銀行不良貸款撥備覆蓋率是動態的，可控制，整體不打算降低，若然低於150%，應用來冲銷壞帳，而不是讓股東分紅，不是讓管理層發獎金。
講到四大國有銀行股價偏低，劉明康就話全球銀行股都不受追捧，匯豐(005) 、渣打(2888) 股價也很低，市帳率很低，這是全球性的，因為銀行息差收窄，撥備上升，不特別針對中國的銀行。
我認為國際銀行同內銀估值都偏低，但原因有啲唔同，內銀主要係資產質素惹起外資關注，跨國銀行就受到不利經營環境壓力，好似匯控旗下匯豐私人銀行(瑞士)，之前被指涉嫌不當銷售結構性產品，遭證監會罰款7800萬美元，銀行同證監仲喺度拗數，但股價就借消息跌1.4%，報49.45元。西方社會在二○○九年金融海嘯後對銀行普遍存在反感，監管機構動輒施行罰款，銀行做生意難之餘，仲要應付唔知幾時爆出的罰款，搞到股價同內銀同病相憐。
抽「超購王」不宜瞓身
匯控都有啲黑仔，公佈完季績撞正大市回落，股價未好過。大藍籌乏力下，恒指收報20449點，下跌76點；國企指數收報8626點，下滑70點，成交565億元。有啲資金轉炒細價股，蒙古焦煤(975) 股價大升78%造0.139元，為升幅最大的個股；和嘉資源(704) 狂升60%收0.088元；永暉控股(1733) 爆升40%收造0.201元。今午截飛的服裝標籤及包裝印刷品生產商Hang Sang(Siu Po)(3626) 招股反應熾熱，市場傳話有大飛包圍，似乎真係生意淡薄，不如賭博。近年好多「超購王」掛牌大熱倒灶，所以想趁熱鬧最好都係小注怡情，無謂瞓身。
陸羽仁
金融High Tea 舊文
來源 source: http://hdfin.stheadline.com
