領展愈鬧愈升
2016年06月30日
港股期指結算，趁住外圍反彈造好，最標青係防守性股份好似公用股同房託基金；被特首梁振英批評嘅領展(823) 仲勁升3.4%，創出新高添。英國脫歐，搞到英國同歐洲亂咗籠，美國好大機會押後加息，據美國利率期貨交易顯示，市場預期7月、9月
和11月加息概率為0%，而預期這9月或11月兩個月減息的概率已達到23%，即係怕歐洲一旦出事，美國減息機會大過加息。
資金追息口敏感股
喺咁環境下，防守性股份成為市場寵兒。除了領展外，中電(002) 都創新高，曾見79.3元，升3.66%，收造79.25元，升3.6%；港鐵(066) 最高見38.85元，亦創上市後高位，收造38.65元，升1.44%；由電能分拆出來的港燈(2638) 也破頂，高見7.28元，收造7.24元，升1.7%。專做民生商場嘅領展(823) 股價創新高，一度高見54.2元，收造53.95元，漲2.96%。
領展因為拆售商場同街市加租，引起政府不滿，特首喺接受報章訪問時，坦言領展不是發展商，若果旗下屋邨商場和街市不能服務市民，會研究提供其他選擇，但目前不打算回購領展。大家要知道明年3月就選特首，家插領展可以攞分，CY和政務司司長林鄭都搶住埋位。
領展財務總裁翟廸強指出，公司一向有奉行社會責任，但要區分這不同於社會福利，領展每年投入企業社會責任的資金達幾億元，其中少收社福機構租金已達3億元。
特首出招，咁啱領展就創新高畀你睇，不過，如果睇埋其他公用股都破頂，可以見到佢表現咁勁，主要係因為資金尋求穩定回報，特別係美國未能加息，資金轉入呢類股份，唔係因為俾人鬧仲贈興升佢幾升。
陸羽仁一向都話，領匯股價其實同美國債息反向相關，簡單嚟講，即係話美債價升、債息下跌，領展就升，皆因大家都當佢係接近定息工具嘅投資，美債息低，就轉買領展收息，如今10年美國國債息率跌到1.46厘的低位，現價息率3.8厘的領展就吃香。至於領展搞乜嘢北上投資，出售資產套現，最多只係錦上添花，同佢龐大嘅收租組合比根本無乜重大影響。從呢個角度講，管理層又係咪需要做咁多動作，甚至惹起市民以至政府嘅不滿呢？即使領展加租唔咁進取，只要美國債息跌，領展一樣得。
小心駛得「萬」年船
喺公用股推動下，恒生指數高開後緩緩攀升，挨近高位收市。恒指收市報20436點，升263點，國企指數收報8571點，漲35點，成交金額636億元。雖然過去三日大市都下跌，但基本上未插穿公投後早上的低位，主要原因係香港上市公司同英歐經貿關係唔算好大，反而受美國利息影響仲直接，所以昨日除咗公用股，地產股都受惠息口前景偏軟而變得都幾靚仔，長實地產(1113) 造47.65元，揚3.5%；新地(016) 、恒地(012) 、信置(083) 都升近3%。
喺升市中兩大內房股都乏力回軟。出現股東爭拗的萬科(2202) 跌勢未止，股價降2.3%，造14.58元。萬達商業(3699) 第六大股東APG負責人表示，萬達商業私有化作價不吸引，萬達商業股價挫6%，收造46.1元，為包尾國指成份股。萬達商業早前公佈私有化方案，大股東大連萬達集團以每股52.8元收購所有H股股份，同時表明不會提高私有化出價。市場當時分析已擔心，私有化價格不夠吸引，私有化方案可能難以成事，萬達商業復牌低見48.5元，與私有化作價有明顯距離。由於有主要股東不接受，令流產風險增加，股價昨日雖然再插，但和研究私有化前的股價仍高出甚多，故此唔係咁值博，所以兩大地產股都係要小心駛得「萬」年船囉。
陸羽仁
金融High Tea 舊文
來源 source: http://hdfin.stheadline.com
