財經評論：不用OT 貢獻更多
■不少香港人每日有返工無收工，見公司同事的時間分分鐘多過屋企人。 資料圖片
「我哋呢班打工仔，一生一世為錢幣做奴隸，嗰種辛苦折墮講出嚇鬼，死俾你睇」，呢首歌陪伴唔少香港人成長，更加寫出打工仔的悲哀，每日有返工無收工，見公司同事的時間分分鐘多過屋企人。漸漸大家就接受了
OT是常態，反而覺得渴望準時收工的同事冇大志，唔勤力。
如果呢個時候，有人話你知，有公司唔鼓勵OT，一旦真係慘豬要OT仲會補水，而且公司純利大增，揮低同行，你信唔信？
唔係吹水㗎，呢間「良心公司」就係大快活（052）啦！比較本港三大快餐的全年業績，當中貴到香港人都食唔起的翠華（1314），純利按年倒退一半；而當中分店最多的「太刻薄」大家樂（341），純利亦跌11%。可能你會話，現時經濟差，少咗自由行，生意跌是常識吧，偏偏大快活純利勁升40%，年賺1.44億元。
點解？唔計其他市場策略，單計對員工的「心」，已經令員工甘願仆心仆命為公司搵錢啦！業績會上，大快活CEO陳志成一句「不鼓勵開OT，個別同事個別情況下要開OT，工作時間較長，公司會提供投入津貼」，筆者聽到都感動流涕，更何況是員工呢。截至今年3月底，大快活、大家樂及翠華分別有4,900、17,575、4,175名員工，而每名員工平均每月為公司賺取40,816、29,473及17,167元，大快活員工遙遙領先可能就是因為公司優待。
可能有些公司會覺得，用錢請員工回來是為公司賺錢，「用到盡」是道理，但好像大家樂般，排出「地獄更表」要員工日踩16小時，員工士氣低落，對客人擠不出半點笑容，遑論殷勤服務，甚或至「黑面趕客」，損失的最後是誰？
首富李嘉誠受訪時曾說，每日工作15至16小時，實際已活了100多歲，大家都認為超人的成功因為非常勤奮，但事實上不少香港人每日工作的時間亦跟超人差不多，可惜我們卻沒有超人的家底，當中的辛酸血淚亦無人看見。
記者：余曉芸
財經評論 舊文
來源 source: http://hk.apple.nextmedia.com
