中環在線：
基建辦成立 財金猛人聚首
■（左起）金立群、陳德霖、曾俊華昨為基建辦剪綵。 張志華攝
金管局旗下的基建融資促進辦公室（IFFO，又稱基建辦）噚日成立，由金管局總裁陳德霖主持成立典禮，近百名財金企業界猛人出席撐場，包括中共已故元老陳雲嘅長子、全國政協副主席陳元，仲有亞投行行
長金立群、財爺曾俊華，同3間香港發鈔行嘅老總都聚首一堂，實行硬銷一帶一路！
喪loop一帶一路
不過，呢個IFFO其實係做乜㗎呢？原來係畀41個合作夥伴，包括中資銀行、退休基金、基建公司等交流資訊嘅平台。身兼IFFO主任嘅金管局副總裁余偉文（Eddie）話，平台唔會主動搵項目，亦都唔會幫機構做配對，但畀大家交流嚇、取長補短，就會有生意做咁話。而搵馮氏集團主席馮國經、通用電氣副董事長John Rice做顧問，Eddie就話因為佢哋係資深、具國際視野嘅生意人喎。
喺成立典禮上面，陳元、金立群、財爺、馮國經輪流上去演講，內容不外乎一帶一路好重要，好多項目會選擇喺香港融資，對香港係一個莫大商機，之後匯豐、中銀、渣打老總都講類似嘅說話。
因為很重要，所以要講3次，財金猛人輪流講一帶一路，加埋應該講咗數十次，不下於今年初梁特份施政報告。但講咗咁耐，唔知幾時先有成果呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
