智取大市：最騎呢高層聚會
■在香港上市的白銀概念股，有一隻叫中國白銀。 資料圖片
白銀價格爆升，喺香港上市嘅白銀概念股，有一隻股叫做中國白銀（815）；另一隻係ETFS白銀（3117），不過後者喺7月19日就除牌，完！
轉個topic先！做財經記者，點都會出嚇街，見嚇上市公司管理層，對
方有時口水多過浪花，向記者推銷股票，正常點都有充足準備，務求將最好一面sell畀傳媒睇。曾經有一間上市公司，出動到五、六個管理層，約咗包括小弟在內嘅幾位記者見面，而在場部份管理層，外表唔評論，表情就係呆嚇呆嚇，無問題，話曬唔係未搭過枱。之但係，其中一位比較激進嘅「年輕有為」管理層，全程唔係玩微信就係打機，望都冇望過記者們，title顯示佢係高層，論姓氏又唔係主席大股東個仔之類，九唔搭八。日光日白，就當睇佢唔到。
同其他高層們傾偈去到中段，小弟問咗一個問題，內容大概係產品喺電視賣廣告，賣出產品後，需唔需要同電視台分賬？高層A好叻豬搶答「不要」！但講唔夠幾句，唯一識講廣東話嘅CFO高層B，打斷阿A插嘴話「要」！然後CFO解釋咗大概兩分鐘。搶答題莫非答中有錢分，答唔中又有得補中？唔講以為睇緊大台阿叻主持節目。小弟出嚟做嘢十幾年第一次遇到，或許亦係最後一次。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
