高追公用股要捱價
2016年07月28日
港股升上兩萬二千點後，好淡角力雖然明顯咗，但港股好似打不死咁。喺美國議息前夕，內地股市急插下，港股依然照升，本周以來已三連升。眼見大戶手瓜咁硬，賺到錢嘅股民陸續袋住先，令累積升幅多的公用股明顯回吐。
深圳出招防AR泡沫
美國議息結果未知，但內地股市上午急回，就令港股由升轉跌。A股近日成交唔多，市場擔心資金離場，加上內地重啟新股上市，令氣氛緊張，深圳股市中午前急插，帶動市況向下，收市前市況稍為回穩，上證指數收報2992點，仍挫1.9%；帶頭下跌嘅深成指數收報10405點，瀉逾4%。深成指跌得急，同深交所發通告打擊虛擬實景(AR)概念炒風有關。近日呢類股份炒風漸熾，措施主要影響投資情緒，會影響部份個股股價，但對於大部份有實際業務的公司不會有影響。
港股在期指結算前，好似有無形之手托住咁樣。香港炒AR概念唔係炒得咁緊要，到內地股市收咗市，港股壓力即時少咗，好友反撲，恒指轉跌為升，收報22218點，升89點；國企指數收報9115點，上漲53點，成交金額697億元。個市繼續靠騰訊控股(700) 撐起，佢全日升1.5%，收報189元，獨力撐高恒指32點升幅；匯控(005) 亦升0.7%收50.6元。內地金融股表現不俗，中國人壽(2628) 漲1.7%，收報18.1元；中國平安(2318) 升0.95%，收報37元；工行(1398) 上升0.9%，收報4.45元。
內地股市腳軟，有大行分析員就估阿爺可能遲啲會出嚟補吓底。上投摩根香港資深基金經理司徒芳華預期，第二季市場投資增長持續下跌，中央或再推穩增長政策，主基調為托底而非拉升，喺周邊環境相對穩定的情況下，A股或於第三季反彈。她指出，A股市場整體估值中性偏低，主板估值逐步接近底部，中小板及創業板估值仍在平均值以上。若穩增長政策出台，建築，建材及水利等行業將從中受惠。
內地股市乏力，市場估計A股短期難以大升，上證三千點成為重要心理關口。美國議息令人關注息口去向，英國脫歐造成全球銀根寬鬆嘅期望，結果令主要股市不跌反升，大家擔心西線無戰事，聯邦儲備局主席耶倫會唔會再將加息擺上議程，所以一有風吹草動，低位入咗公用股嘅贏家就沽吓貨，好似半年業績倒退的港燈(2638) ，續被花旗唱淡，收造7.32元，再挫5.8%，呢鋪真係要收好耐息，先補得番跌價。中電都喺創咗84.35元新高後就倒跌，收報82.2元，跌咗2%，最低仲插過去80.8元，高位追貨者要捱番一輪價。中電咁大隻股一日高低差幅4.4%，可見公用股都開始位高勢危，創高後回吐得好急吓。
Pokémon Go熱潮考耐力
呢個星期Pokémon Go登陸香港，掀起熱潮，炒起埋本地電訊股，呢個都可以算係小小AR概念炒作，但暫時仲未算係起泡。摩通大通發表報告，估計每位用戶在該遊戲平均每月使用100至300MB數據量，加上預料玩家花在Pokémon Go時間會漸漸減少，另香港電訊推無限Pokémon Go數據計劃，其他電訊商都有意跟隨，故對本地電訊商收入影響有限。
受報告影響，本地電訊股全線下跌，和記電訊(215) 挫3.7%，造2.89元；數碼通(315) 下滑2%，造13.78元；香港電訊(6823) 跌0.6%，造12.08元。有中環茶友就問，呢個遊戲熱潮可以流行幾耐呢？茶友係個四肢不勤嘅大忙人，平時最怕熱同出汗，就算要做運動都寧願匿埋室內做機，所以對於要用步行嚟捉精靈嘅遊戲有啲抗拒，但呢個遊戲大家講到唔可以唔玩，咁就點都試吓，旨在有個話題，至於長玩就無謂嘞。如果好多人似佢，咁呢個遊戲嘅熱潮，可能三幾個月就過去。
陸羽仁
金融High Tea 舊文
來源 source: http://hdfin.stheadline.com
