一路一帶：
千年契能否渡過2047？
■就算你持有太古城呢個千年契單位，2047後嘅地契問題，依然可大可小。 資料圖片
歷史問題，應該由邊個解決？2047的地契問題成為明年特首選舉嘅一個變數，大家都擔心30年後層樓仲係咪私人資產，最近有朋友指出，銀行已經唔批30年按，要夾硬減一年變成29
年按，證明2047已經唔係杞人憂天。其實地契年期問題，亦正正反映在樓價身上。
港島區樓價較九龍及新界區長期有一至兩成溢價，主要原因除了因為港島物業供應所剩無幾，其實仲因為地契及土地用途，當年港英政府喺1848年至1898年期間所批出及成交的土地，地契年期大部份都係999年，即係千年之契，呢啲地契通常喺中上環、半山、灣仔同北角區，呢啲千年契除咗年期長，土地用途都好廣泛，通常都係商住兩用地，現時新批嘅土地，除咗地契年份短，只得50年，用途仲好有限制，住宅地就起住宅，商業地就唔可以用嚟住人。同時，港島區嘅地積比率一般有十倍，九龍只得九倍，港島有先天性優勢，樓價自然高人一籌。
其實灣仔、北角區好多舊樓業主都坐擁千年之契，理論上唔使擔心2047年大限，不過特區政府都好有心機去「解決」千年契嘅麻煩，例如特登派市建局去回收舊樓重建，將千年契舊樓強拍後，再同地產商合作起新樓，補地價上畀番平少少，增加番樓面面積等等甜頭，成功將地契由999年變成50年，例如灣仔區好多舊樓都成功被政府改契，好似華置（127）當年同市建局重建而成嘅尚翹峰，其他就唔一一盡錄啦。由於發展商都係重建賣樓，沽完貨拍拍屁股走人，話之你地契有幾長。
港人上車需求大，購買力亦深不見底，尤其有好多幫仔女上車嘅「慈父」，平均呎價1.5萬元嘅元朗新盤都大把人爭，中資地產商又不斷搶貴香港地，就連原本想解決香港人居住問題嘅「港人港地」，都要用九龍站豪宅價發售，屯門地又現癲價成交，麵粉價要成6,800元一呎，買樓係畢生嘅投資，坊間有指政府遲遲未諗到解決問題，相信2047年業權批租問題唔會點變，但建議大家要留意番，九倉（004）四年前用79億元續租海運大廈21年，就算你持有太古城呢個千年契單位，2047後嘅地契問題，依然可大可小。
斯郎
https://www.facebook.com/oneroadonebelt/
本欄逢周四刊出
斯郎
~TITLE_S~一路一帶 - 斯郎 2016年8月25日 舊文
來源 source: http://hk.apple.nextmedia.com
