中環在線 - 李華華 2016年9月7日
中環在線：
上市公司商會論壇唔准講英文
■梁伯韜
證監會與港交所（388）呢幾個月推出上市架構改革諮詢，為立法會金融服務界嘅3位參選人提供戰場。家陣張華峰連任，戰場依然熱鬧，上市公司商會今日就擺龍門陣，搵證監、港交所代表落場，但據聞佢哋唔想對方派西人做代表，香港係國際金融中心喎，典解嘅？典解嘅？
上市商會主席「紅籌之父」梁伯韜、副主席「創業板之父」羅嘉瑞講明反對諮詢建議，兩位老行尊出面邀請證監會、港交所代表參加論壇，本意係想三口六面講清楚，費事雙方隔空開火，意思被誤解就唔好喇。
傳港交所證監無人去
有趣嘅係，聽聞有人建議證監同港交所，最好派個講中文嘅代表出席論壇，所以就算港交所上市主管David Graham想去親自會一會業界，人哋都未必歡迎。商會邀請函亦寫明，大會語言係廣東話、普通話，有英文問題先用英文答。
咁奇怪嘅？香港話曬係國際金融中心，上市公司商會又個個都飽讀詩書，用英文辯論應該冇有怕喇。唔通佢哋係為咗現場氣氛著想？可能大會怕一句中文，一句英文，又要搵現場繙譯，討論氣氛即刻唔同曬，現場觀眾冇咁投入啩，點都唔應該係怕咗講英文嘅，你估係某啲出局議員咩。
但據了解，證監唔打算派人去，港交所行政總裁李小加原本安排咗公幹，見證監冇人去，所以按計劃出差去了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
