Can Bank - 散子 2016年9月27日
Can Bank：你會住劏房盤嗎？
■何文田新劏房盤加多利軒 資料圖片
還記得……去年，港股大時代即將走到盡頭之時，筆者在健身室內的桑拿房中感受到師奶們對港股的熱情，對冧巴的鍾愛，對企業盈利前所未有的關注。筆者所見的不是個別師奶，而係成個桑拿房都係師奶股神，結果如何？大家都睇得到。
呢個情況最近又出現，今次嘅場境比起桑拿房更加大眾化，因為只係響公眾交通工具上，話題亦都有所轉變，由股變樓，人物亦由一群師奶，變為一對男女。以下為談話內容：
男：「𠵱家啲樓都唔係一般人買嘅，搵唔到6萬至7萬銀都買唔起。」女：「搵到6萬至7萬銀先買得起，唔係人住啫。」
唔使聽曬這對男女嘅談話內容，亦都可以想像到今時今日買樓嘅難度。以最近「熱爆」嘅加多利軒單位計嚇數，以上個星期公佈嘅價單，最平單位375萬，181呎，九成按揭，息2.15厘，還款期25年，月供要14,553元。最貴單位809萬，390呎，最多只可以做六成按揭，月供要20,930元。
揀得何文田新盤，除咗街坊之外，相信就係買佢校網，換言之，買家極有可能是上有老下有小，這樣除供樓之外，自然有不少供養開支，6萬至7萬銀的確又真係有啲緊緊地。不過，更重要的是，本報確曾報道該盤有個不能坐的馬桶，發展商亦不厭其煩地解釋廁所門嘅用途係用來隔水。但真心問一句：「你會住嗎？」
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com
