智取大市：港股有一個凶兆
■港股現死亡訊號，散戶要多多留意。 資料圖片
港股連續三日以偏高成交額，由高位沽足千點，每日跌股數目超過900隻，冇壞消息之下大戶係咁喪沽，途中恒指一個下跌裂口都冇，睇怕啱啱呢三日只係一個急促嘅派發階段，以防稍後有更可怕嘅拋售潮，暫時不估底。圖表上，仍要睇
緊星期五仲係咪跌，如無意外，恒指周線圖會出現一支大陰燭，將上一個星期小陽燭包到冚一冚，有機會形成完美嘅周線圖穿頭破腳形態。
究竟係咪咁凶險？我用例子答你。由2008年至今，未計今次，恒指出現六次中線升浪途中嘅周線大陰燭穿頭破腳，冇一次走得甩，即時確認見頂，然後進入跌浪，爭在係跌一個月，定係跌幾個月。
以其後六個月最低位作為量度跌幅，跌最少嗰次係2014年9月後跌浪，再跌多2,030點見底；跌最多嗰次，係2008年5月後金融海嘯嘅14,387點。至於舊年港股大時代見頂，亦係喺高位以周線大陰燭穿頭破腳完成，呢個死亡訊號，勁過啲乜嘢死亡交叉多多聲。
如果見報嘅星期五，港股戲劇性急彈，上述嘅大陰燭穿頭破腳形態當然唔成立，到時當小弟口臭冇講過。不過，凶兆呢家嘢，早一日講，總好過遲一日講吧。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
