智取大市：樓市明年黑天鵝
■通脹預期加速資金流入樓市，同時令未來樓市購買力急凍。 資料圖片
過往高通脹出現，央行會加息應對，今次唔同嘅係息都未加，環球樓價已升到高水平。中港樓泡沫夠大，其實美國樓都唔弱，標普Case Shiller20大城市樓價指數見190.91，只較2006年高位206
.52低7%。或者世人享受得太耐超低息，令到呢個世界嘅併購、資產買賣，都係建基於超低息。如果加息到肉的話，資產喺現價就賣唔出，因為扣除利息後嘅回報率不再吸引，再次進入現金為王嘅世界。美國不停製造加息預期，但盡量拖延加息，令接近零息一直存在，呢個係重要原因。
結論係，除非通脹預期高到失控水平，唔迫埋牆角，都唔會作出具意義嘅加息。能夠製造出兩難局面，最老套地都係通脹。不過，高通脹初期或會形成經濟好轉嘅錯覺，短暫刺激股市。
呢一輪資產泡沫爆破，有兩種可能性觸發，第一，大到不能倒嘅金融機構倒下來，引發去槓桿資產拋售潮；第二，通脹預期加速資金流入樓市，同時令未來樓市購買力急凍，缺乏承接力從而令樓市見頂。按現況睇，大到不能倒嘅機構出事，央行必定印銀紙解決，反而第二種可能性正醞釀出現，十年一閏真危機，莫非成真？
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
