【實力取勝】股仔狂潮再起 一齊衝吧！ （陳承龍）（第95期）
2016-10-23 12:00:32
近日港股日升日跌，閒閒哋一日幾百點上落，已是閒事，這就是近期港股的新常態，但純看走勢加各項可預見的因素，例如美國加息，美國總統大選，這些因素，市場已消化了不少，好難再數到
黑天鵝出來，因此預期今個10月，港股都是炒上落格局居多，上落區間維持在22800點至24200點之間。
既然是上落市，大家的入市策略也偏向彈性，例如喜欺炒藍籌的朋友，要看位炒上落，不要像之前大單邊升市般死揸，不妨走嚇位！尤其炒衍生工具的朋友要特別留意。
不過，就算近日個市點樣大升或點樣大跌，大家都係咪覺得冇乜嘢?因為你依家炒緊嗰啲股仔都唔關個市事。近日啲股仔好明顯轉曬勢，一撻就著，好多隻都係，原因好簡單，因為大股呈整固格局，資金唯有向股仔埋手，加上好多股仔啲價真係好殘，根本跌唔落，跌唔落咪掉轉炒上去囉！更重要嘅一點，我近期從中央結算嘅資料顯示，有好多股仔都被一些中資行收乾曬，似乎幾中我哋雜誌先前嘅分析，就係港股A股化，即係炒供求，貨就被中資收乾，下一步就當然是大炒。
事實上，大家有冇發現近期不少股仔一踢就行，就正如上述所言，一來跌唔落，二來貨乾，冇大貨沽，所以可以一下子追返幾年的升幅。還有，股市尤如賭場，尤其如百家樂枱，如果好多鋪都開長莊，一定好多跟，贏完再追，而股票市場如是，今日贏完呢隻，個股票倉多咗錢，之後會再積極押注下一隻，如是這，啲股仔就日日係咁狂炒。
最佳例子就有早前的易大宗（01733.HK）和蒙古焦煤（00975.HK），有不少都從呢兩隻股身贏咗唔少錢，跟手就轉炒其他股仔，而近日就有伯明翰環球（02309.HK），都係皆大歡喜，所以短期多一兩隻股王出現，股仔都有排炒。
就短線而言，既然孫粗洪撻著咗隻伯明翰，佢咁紅，可以搵佢嗰批股落注，包括環能（01102.HK）同埋隻企展（01808.HK）。論市值，後者夠細，加上合埋股，應該現唔到嘢。仲有一隻可以睇睇隻長盈（00689.HK），呢隻年頭以每股0.25元供乾，孫粗洪又用每股0.168元做全購，非常安全，近日更剛委任了自己入董事局，應該有茶飯，要睇實。
總括而言，目前金魚缸好多魚，大家都不斷湧，這就是市場自然力量，而這股力量正在壯大中，就是今次我覺得股仔狂潮再起的重要原因，如果夠吉士嘅話，大家不妨齊衝吧！
實力取勝 - 陳承龍 舊文
來源 source: http://www.winmoney.hk
