智取大市：股王騰訊就快跌
■騰訊股價有轉弱的跡象。 資料圖片
騰訊（700）係股王，升咗十幾年，總會有轉弱嘅時候，要短期擊落呢隻股，就係睇周線圖MACD沽售訊號。去到下星期，呢個訊號將會再次出現。
話說騰訊喺2011年6月至2013年3月期間，股價呈上落格局，但完結咗呢段上落市後，
股價至今進入咗長期大升浪，再升多3倍。騰訊喺呢段長期大升浪裏面，都唔係冇調整過，其間仲出現過5次周線圖MACD沽售訊號，除咗第一次訊號失效之外，最近呢4次，周線圖MACD沽售訊號出現後，騰訊都有真調整。由MACD訊號出現至3個月內嘅低位計，跌幅介乎7.2%至21.2%，弱勢時間介乎一個月至兩個半月。
當然冇人係先知，所以冇可能捕到個最低位的，但如果重覆過往騰訊股價趨勢嘅話，由下星期正式出現沽售訊號起計，要佢跌返起碼一成半成，機會確係高。如果閣下諗住疊埋心水等買騰訊然後長線持有，就可考慮分注低啲先買，策略係由下星期五收市價作為起點，跌5%撈第一注，然後再分注低撈。如果有貨想食糊，嚟緊係出貨時候。
至於騰訊弱勢同時，恒指係咪好弱，答案係跌多升少。上述4次騰訊調整浪同時，有3次恒指出現逾1,500點跌幅，剩番一次先升後回，結論係港股年底前冇得升。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
