摸魚手劄：
講人話就哄得你高興？
■筆者唔知胡官有幾大野心競逐，但相信冇乜，所以講講所謂的人話冇乜所謂。 資料圖片
胡官出來話要選特首。首先胡官胡國興這個名可以作為一個年齡測試，聽過胡官或對胡官有印象的多是上一輩，因為胡官早就退了休，也較少在媒體露面。年輕一輩如我，也許會依稀聽過這
個名字，但印象一定不深。
特首跑馬仔，一定要有人陪跑，順便擾亂一下視線。我沒有考據胡官背後太多政商、朋友脈絡去。不過，大操盤員一定做足審查，確證無大害，才容許，或引導，或指令他一同陪跑。站在胡官角度，本是退休閒人，參選無後顧之憂，公眾形象算健康，玩玩也無妨，順道多讓自己大名在媒體曝曝光，又或當幫後人、朋友「積積福」，在大操盤員身上賺多少少好感。陰謀論太多，訊息量太多，天知道有無其他參與人途中會有急性隱疾、突發重大意外（touch wood！），話唔定亂局可以冷手執個熱煎堆。因為這是概率問題，入了閘，無論當選機會率有幾低，至少大過0；但無入閘，當選機會一定是0。
我本來期待胡官會講佢經濟理念和論述，甚至有少少政策框架，好讓我可以點評幾句。葉劉的葡萄係有道理，因為胡官現在的論政無講出一個所以然，係煽嚇情咁。
我唔知胡官有幾大野心競逐，但相信冇乜，所以講講所謂的人話冇乜所謂，反正社會太多負能量，幾句人話說出來又冇乜成本，也必是跟大操盤員交代過、摸過底，讓民間消消氣，是本小利大的操作。看，幾句看似中肯的說話就哄得大家高高興興，唔講仲以為自己有票。四年前特首選舉，甜言蜜語仲未聽夠？別人眼中的人話，於我眼中是廢話，口蜜之下永遠唔知有冇腹劍。香港人真係好善忘，條氣真係好易就順，難怪會被人話係順民了。胡官說話的底線是有得解讀，例如六四講得、佔中係好玩，但港獨就不容挑戰了。
咩係人話？星期日財經新聞最鍾意訪問年輕人為甚麼急於上車，那些答案是人話。訪問其父母為甚麼幫子女供首期，那些答案是人話。因為就係最真誠、最赤裸。女傑青黃仰芳講買樓心得，也算人話，雖然內容非常討人厭，但這至少是女傑青由做傳銷、畢業做金融推銷員一直被灌輸的信仰。挑戰一個人信了廿幾年的信仰，係本質上對佢人格最大摧毀，好殘忍的，應該要同情同可憐佢人生被金錢價值支配了。至於蕙禎bb話年輕人冇得撲野，當然也是人話囉，因為這是非常完全是年輕人的心聲，反映現實。
渾水
http://www.facebook.com/muddydirtywater
渾水
摸魚手札 - 渾水 舊文
來源 source: http://hk.apple.nextmedia.com
