經濟客艙：香港流動支付輸畀肯亞
■香港流動支付連肯亞都跑輸。 資料圖片
香港流動支付發展點只跑輸中國、南韓同日本其他亞洲地區，我哋連非洲國家肯亞都跑輸。
肯亞有動物大遷徙睇外，呢個國家嘅流動支付發展走到最前。截至2013年，估算肯亞人口超過4,400萬人，當中近
九成人擁有手機。肯亞銀行業唔普及，搵大象同獅子，可能易過搵間銀行分行，所以造就流動支付嘅發展機會。
兩年前，冇錯係兩年前，彭博已經有位記者親身試玩肯亞流動支付，由落機、截的士、食飯到參加大草原觀光團，使用M-pesa流動支付搞掂。呢個流動支付程式2007年推出前後，註冊用戶超過2,000萬人。
M-pesa嘅發展幾乎比Apple Pay、Samsung Pay幾乎快咗十年，當中最有利因素選擇正確市場，尤其一個奉行無現金、人人機不離手嘅市場。最近去日本嘅蘋果公司CEO庫克做埋大公關，拎住iPhone7搭JR，用Apple Pay畀錢，身體力行無現金化交易。香港嘅流動支付剛剛起步，但唔少用家仍然以八達通繳費方式相比，覺得更方便，又真係估唔到部份人對97回歸後推出嘅電子支付咁有感情。消費習慣嘅野，唔係話改就改，但同時科技發展走得幾遠，都係大家造就。當大家呻緊科技發展龜速，另一邊睇係咪我哋唔願走出comfort zone？科技發展同跑步差唔多，想跑得快，就唔好左顧右盼，唔係跑慢人哋幾秒，分分鐘跑輸人哋一個十年嘅光景。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
