智取大市：拆解美股怪思維
■特朗普當選後，美股由地獄邊緣拗腰戲劇性爆升。 資料圖片
特朗普當選之後，美股由地獄邊緣拗腰戲劇性爆升，如果事前有人估到呢兩日形勢發展嘅話，就要受小弟一拜。不過，估唔到還估唔到，要贏人，就一定要知己知彼，咁先可以制定下一步策略如何走落去。
美股上升，代表一
班短視而聰明嘅美股投資者，認同特朗普對於美股嘅影響係中性至利好。佢嘅政綱，包括向其他國家徵收關稅、對美國企業減稅、提倡加快加息步伐之類，綜合嚟講，美國企業的確有機會短線受惠，至於可能觸發美國同其他國家打貿易戰等等，負面影響來得太長遠，或許未去到投資者考慮嘅重點，所以有買盤掃美股。
不過，香港上市公司冇直接受惠利好因素，但負面因素就會照單全收。除咗出口股最慘之外，資產股亦因加息受壓，特朗普對其他中港企業影響係短線中性、長線負面，受惠股實在唔多，至少各大藍籌股情況如此。港股跟隨美股戲劇性反彈，睇嚟純粹市場氣氛使然，稍後有頗大機會跑輸美股，而特朗普概念冇改善中港股基本因素，港股自然會承接選戰前嘅走勢，就係跌。
少數受惠特朗普概念嘅股份中，江銅（358）升14%一去無回頭，加上通脹概念，如有整固，絕對值得買。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
