【實力取勝】參加金融展學會的三件事（陳承龍）（第98期）
2016-11-13 15:00:59
剛過去嘅5日至7日，《港股策略王》返咗深圳參加「第十屆（深圳）國際金融博覽會」，一為推廣策略王app同winmoney.hk，二為趁深港通就嚟有通車時間表，同深圳金融界交流一下。
小弟唔多返深圳，有都係返去參加300至500人出席嘅講座，大型展覽真係第一次去，學到唔少嘢。
第一件事，係內地股民鍾意聽故仔。有份留守攤位嘅「圖太郎」，普通話非常麻麻，開頭都唔知點同參觀者講乜嘢係深港通同小盤股（即係細價股），完全摸不著頭腦兼無興趣，「圖太郎」人急生智，同內地股民講無人不識嘅馬雲，想搞藥業之時，就買殼中信21世紀，變身做阿里健康（00241.HK），之後就大升特升，內地股民唔明港式普通話都明白買殼道理，就雙眼發光，追問香港細價股點炒。
內地股民追問點炒香港細價股，就衍生第二個問題：內地人吸收唔到最好嘅港股資訊。好似美國總統大選，香港唔同媒體都做直播，但我哋人喺香港報道一件發生喺美國嘅事，完全隔岸觀火，好多細節真係識條鐵。內地股民睇港股資訊都係同一道理，雖然好多網站都有港股資訊，但要做到有市場觸覺、唔離地兼實用，真係冇咯，內地人炒港股，點叻都係門外漢，所以點都需要優質、一手嘅港股資訊。至於點解策略王咁肯定內地朋友愛炒香港細價股，已經講過N次，呢度唔浪費版位。
最後就係，內地股民係對港股有興趣，但無從入手。擺展覽真係好著重交流，呢三日嘅分工，除咗舉辦兩場講座同記者四出採訪外，我哋仲分咗做一隊人留喺攤位講解，另一小隊周圍同其他攤位交流。我哋人對人咁介紹香港股市狀況畀內地股民知，好多港股運作方面，佢哋都一知半解，但又唔港股知點學，希望今次策略王嘅同事，幫到佢哋解開疑團。
而最喜出望外，係有個自稱內地發展商（佢派嘅卡片都係咁寫），話公司喺香港有塊地，想搵人發展塊地，咁啱見到攤位有前進控股（01499.HK）嘅宣傳品，問我哋工作人員可以可以幫佢轉達個信息畀前進老闆。姑勿論呢啲由「呃水吹」嘅交流最後能唔能夠成事，但起碼為港商搵到個機會。
今次參展，難得咁多同事周六、日都唔休息照開工（之後會有補償），小弟真係好感動。今次幫手安排展覽事宜同食宿等嘅同事，亦安排得井井有條，令港股策略王出版有限公司由當初講講下就搞咗出嚟嘅公司，變得啲事有曬分工同程序，漸漸有中、大型公司嘅規模，為未來進入國際資本市場打好重要嘅根基。
實力取勝 - 陳承龍 舊文
來源 source: http://www.winmoney.hk
