財經評論 2016年11月22日
財經評論：辣招辣㷫細價樓
■部份業主不信樓價會因為辣招大跌。 資料圖片
政府加辣，但兩個多星期以來，二手市場密密創新高。無他，因為這批買家不信政府出招能令樓價跌，繼續入市，但業主不願放售，市場上賣一間少一間，個個吊高來賣，企硬零議價，甚至反價；剛性需求下，買家明知貴，焗買去追價，造就高價成交。
為何千萬元以上的物業，不及數百萬元的成交多？前者買家以換樓客為主，以先買後賣方式，預支大筆資金交重稅，不少人覺得困難，暫時不買。數百萬元的細單位，客源多屬上車客，可按舊制交稅，承做較高成數按揭，首期少，整體成本較輕，加上以往政府多次出招，樓價沒調整得深，就再升凸，對於今次加辣招同樣覺得廢，不信樓價會大跌。然而，新盤入場費數百萬元選擇少，往往只能揀劏房盤，內櫳細得驚人。除非一個人不煮飯，返屋企就瞓，才買冇房單位；如果兩個人住，當然有房好，但一手似樣的兩房戶隨時逾600萬元。二手市場以500萬元價錢就可搵到正常的兩房單位，而且不用等超長樓花期，管理費亦平一截，帶動此類成交熾熱。
作為業主更覺得加辣招冇效，完全無恐慌性拋售，自住的未必急於換樓，投資的屬長線，不少早年入貨價低，現有租客幫手供樓，獲5、6厘或更高回報率，為何急於賣？目前不是跌市，繼續長揸好過，所以市場極缺盤。放盤的業主清楚知道樓市乾柴烈火，單位唔憂賣，加價反價有客爭，執得幾多得幾多的心態不難理解。
記者：溫潤潔
財經評論 舊文
來源 source: http://hk.apple.nextmedia.com
