【實力取勝】策略王不再只係一本書（陳承龍）（第100期）
2016-11-27 14:00:49
不經不覺，策略王咁就100期，呢兩年時間好似過得好快，我所講嘅快，係依家嘅周期好快，睇返今期我哋嘅回顧，過去呢兩年，股市已經歷了一次牛市和熊市，你話係咪好快先?所以喺依家咁快嘅周
期下，更加好好掌握資訊，否則就會好執輸，好似呢輪個市咁，指數好似唔上唔落，但那邊廂，啲股仔炒到癲曬，而且可以日日種類唔同，今日炒礦股，聽日炒醫療股，過兩日又炒返券商股，不過最好炒都係殼股。不過，喺咁變化嘅市況底下，財經資訊就更加值錢，所以港股策略王就更加值得做好佢，呢個就係我捱得咁辛苦嘅原動力。
回顧呢兩年，除咗個市走得快之外，連策略王本身也發展得好快，由初初第一期只得幾十版的雜誌仔，加嚇加嚇，到現在就嚟近百版，內容豐富了很多，而且更定了不少獨特的欄目，例如半新股生日會，又或者殼股天地，都係坊間沒有的東西。除了這些變化外，風格上也變了不少，由初初較為玩味濃，到現在既輕鬆，但又有料賣，例如過去一段時間，爆了幾單獨家新聞，都令市場側目。有啲行家更不惜抄我們的輕鬆，但始終第一個係醒目仔，第二個就係傻仔，明未？
不過雜誌畢竟一個禮拜先出一期，好多時都唔切依家咁快嘅市況，所以網站絕對不能少，因此去年8月推出了自家網站winmoney.hk，仲要有埋即時報價，死未?不過，我就真係就死，又要拎一大筆錢搞投資，而且仲未能即時見到有收成期，你都咪話唔頭痕，而且出呢個網站之時，港股剛好見頂調整，但唔整都整咗，唯有焗做。
淨係得網站又唔夠，又要有app先掂，最後，喺今年5月，我哋又出咗策略王即時新聞app。不過，都唔可以話自己唔好彩，事關出完呢個app之後無耐，就英國公投，港股大插見底回升幾千點，就係咁，個市一旺，我哋嗰app堅係幾多人下載，比預期好好多，因為好多人想睇我哋啲獨家猛料去投資。
還有一個更離譜的變化，就係社交媒體為傳媒帶來不少商機，例如我們的FB直播節目，我敢大膽講，行內冇一家行家好似我哋咁多人睇，所以呢度我哋都有啲商機，例如搵廣告商特約我們的策略王直播，事實上，由下周開始，我哋有廣告商特約我們做節目，記住收睇。
講到尾，現在做財經傳媒，比以前艱幸，但始終離不開消息準，同埋要夠快，而策略王過去一段時間叫做做得到，但當然仲未夠，要再系統化，希望我們的不斷進步，對讀者有幫助。
至於我個人願望，希望策略王不再只係一本書，而係一個成功品牌，之後真係可以越做越大，如果可以上市既話就加好啦！希望呢日快啲到。
實力取勝 - 陳承龍 舊文
來源 source: http://www.winmoney.hk
