唔怕市呆 最怕買錯
2016年11月25日
美國加息預期未散，不過，全球股市中香港都算好唔靚仔，皆因美股連續三日創新高，內地股市都造好，但港股彈咗一日，又跌番兩日。中環茶友話，美股受惠經濟前景轉好，內地股市就受惠人仔下跌，港元匯價偏高，前景唔特別靚仔，有點左右不是人，所以咪中招囉。
港股上蒸下焗
美國聯儲
局下個月加息幾乎無懸念，但大戶同股民就當正佢係牛市嚟炒，杜指上破完19000點，O依家仲話上望20000點。踏入11月尾，就到感恩節，初步話市場消費情緒幾好，刺激美股向上。美股情況有點似典型加息初期嘅炒家。通常聯儲局點解要加息呢？就係經濟加快，市道升溫，儲局要調高息口去冷卻經濟，但加息初期企業同消費者負擔唔係咁重，加上經濟好大家收入增加，所以影響唔大，喺感覺良好下，加息非但無影響市道，反而仲令人覺得暖洋洋，係咁儲局會逐步調升利率，直至有人大家突然覺得負擔好重，或者有債務沉重嘅企業頂唔順倒下，咁加息效應就會浮現出嚟。
呢次聯儲局加息由於事前張揚咗接近三個月，市場已將佢變成代表經濟加速嘅好消息嚟睇，加上特朗普當選增強咗未來市場會再熱啲、通脹會再上嘅預期，所以令美元美股變強。
美元呈強勢令人仔下跌，佢喺反彈一日後，昨日兌美元收挫261點子，報6.9189兌1美元，盤中曾跌破6.93關，與中間價均創近八年半新低。離岸人民幣早盤一度跌破6.96元關口，再刷紀錄低點，與在岸價差擴大至400點，隨後探底回升。離岸人民幣新報6.9471，反彈71點子，較在岸收市價低282點子。通常匯價弱有利當地旅遊同消費，所以用當地貨幣計嘅股市會有利，情形一如英鎊脫歐後，英股反覆向上嘅道理一樣。所以，上證指數再升，收報3241點，升0.6點。
喺中美股市造好下，港股就最尷尬，因為香港經濟似內地，匯價跟美國，變咗上蒸下焗，所以美元美股一直強，港股一直弱，昨日恒指低開，跌幅曾擴大至低見22487點，最多跌189點，午後一度收窄，恒生指數收報22608點，跌68點，跌幅0.3%；國企指數收報9678點，升12點或0.13%；成交金額558億元。雖然港股處境咁尷尬，但匯價同利率因素始終都會反映，港股O依家勝在估值唔貴，如果出現急跌，咁就有可能探到短期低位，有機會博到反彈。
押寶「雙金」最易中
雖然指數無睇頭，但捉到攤路仲依然有機會賺餐茶。呢排最易押中就係「雙金」，即是金融同金屬類股份。內險股就繼續造好，國壽(2628) 大漲3%，報21.85元；中國太平(966) 升3.9%，報17.74元；新華保險(1336) 升4.63%，報39.55元。
金屬股因為之前跌到殘，所以彈咗一輪都仲鑊氣未散，中國大冶有色金屬(661) 逆市爆升20%，報0.17元；悅達礦業(629) 大漲17.5%，報0.37元；中國多金屬(2133) 走高12%，報0.285元；中國鐵鈦(893) 上揚12.33%，報0.41元；鐵貨(1029) 升7.94%，報0.34元。大隻金屬股穩陣啲，但升幅無咁多，中鋁(2600) 升6%，報3.58元；江銅(358) 升6.4%，報12.6元；新疆新鑫(3833) 漲7%，報1.35元；中信大錳(1091) 走高5.6%，報0.57元；洛鉬(3993) 升5.5%，報2.1元；俄鋁(486) 升5.4%，報3.53元；中國稀土(769) 升5%，報0.63元，金屬股呢一隻大漲小回，累升幅度甚勁，夠膽買中真係可以提早揀聖誕禮物。
陸羽仁
金融High Tea 舊文
來源 source: http://hdfin.stheadline.com
