中環在線：
財金界派對至愛是非精
臨近聖誕新年，好多公關朋友好忙，忙乜？忙搞聖誕party囉。公關最頭痕就係要喺有限budget下，搵到明星、名人做主持或嘉賓，而上市公司或金融機構
最鍾意搵嘅藝人竟然係「是非精」！
聽公關朋友講，佢哋本身唔想搵大台藝人，奈何唔少公司老闆或老闆娘係大台師奶劇粉絲，咁佢哋當然要迎合老闆口味先啦。
大台藝人嘅出騷價出名貴，好似「有線黨」翠如BB、洪永城等受捧花旦、小生，一啲都唔平。「DJ黨」林盛斌（Bob）、森美、小儀、陸永好多人爭，貴得嚟又難度期。
新聞小花被冷落
公關要顧住budget，於是轉向綜藝節目藝人入手，一班「是非精」，即係節目《學是學非》幾位靚女主持人原來好受歡迎，包括黃心穎、李佳芯、張秀文，早前財資市場公會就搵來心穎BB做周年晚宴司儀。公關們都覺得「是非精」價錢合理，又講得、唱得，可以搞氣氛。
至於近年好多前新聞小花轉做自由身，接job做活動司儀，照理佢哋應該有大把機會，點知又唔係喎。公關朋友話，公司搞party主要想熱鬧嚇，主持、唱歌走唔甩，新聞小花做主持就得，其他未必配合到。而且前新聞小花越來越多，公司老闆未必識，冇理由請老闆唔識嘅人，就算由主播界轉戰演藝嘅方健儀都未必係佢哋杯茶喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
