樓加股 變鑽石
2016年12月23日
美股在兩萬點關口前徘徊，稍為回軟，港股就外圍小跌，香港多跌，一舉抹走周三的反彈幅度有餘。
宏安財技變出1356%升幅
喺呢啲靜市下，基本上只有特別情況嘅股價，先至有得郁。好似今年埋單計數，有可能打入最大個股升幅榜的宏安地產(1243) ，就繼續撩上。佢O依家市
值突破200億元，已接近一間中型地產公司的身價。睇番佢喺今年四月份上市，當時反應好一般，只有兩倍超額，認購人人有份，訂價0.92元，只係中間價。
不過，宏安上市之後就係咁升，月前宣佈1拆10，今個月初除淨，股價趁新舊股換檔期再大炒，昨日佢收市報1.34元，再升15%，等如舊價13.4元，累升左1356%。
宏安係新進發展商，趁梁振英上台做特首前後地價挫一挫，勇奪左幾幅新界地，賺錢之餘成功上市，O依家市值飆到去203億元，可見樓市係香港金礦，若然加埋股市一齊玩，直情可以變埋鑽石礦。當然，呢啲石頭變鑽石嘅寶藏，唔係一般人可以發掘到兼食得到，如果唔係炒股專家，都係旁觀欣賞好過。
講開地產加股市嘅傳奇。昨日港鐵(066) 何文田地王開標，結果又係被內地背景嘅公司投得。今次中標嘅公司高銀金融(530) ，同系有高銀地產(283) ，公司喺天津發跡，當年有強勁背景在天津拿到大地皮，近年進軍香港房地產，其中一個大型項目在九龍灣的商銀中心。
今次何文田地王係優質項目，港鐵招標當然係條件加辣。近年何文田有幾幅靚地推出，主要由本地大地產商，好似新地(016) 、會德豐(020) 等投得，但呢啲大財團今次都不敵內地財團，令人諗起最近啟德兩塊住宅地都被海航集團以天價投得。
內房商手法不遑多讓
內地財團搞項目，同樣係財技結合生意，呢次佢地投地既因為內地資金多，加上習大大話左內地樓係用嚟住，唔係用嚟炒，令好多內房商南下，同一時間，人民幣下跌，相信佢地買嘢都有資產配置同貨幣因素嘅考慮。
無論係高銀抑或海航，佢地一邊豪買資產，一邊利用發股發債去融資，呢啲進取嘅技法本地財團唔會做，所以短兵相接，自然無法抵擋，結果亦搞到出現地價高過樓價，用內地講法「倒掛」嘅現象。
內地資金湧入買地，可惜買股就唔多，所以港股交投續靜。受到隔晚美股三大指數回落拖累，恒指低開後反覆向下，最低曾見21594點，挫215點，創逾5個月低位，收市前仍未扭轉跌勢，收報21636點，跌173點；國企指數收報9200點，下滑131點。聖誕節長假期臨近，成交僅得502億元。
習主席開中央財經領導小組會議，在會上又提到房地產泡沫，話「規範住房租賃市場和抑制房地產泡沫，是實現住有所居的重大民生工程。」內房股聞風腳軟，萬科(2202) 插3.5%，收17.84元。
內險股藉債市稍穩彈左一日，但債市仍缺乏信心，中資金融股受壓，中國太保(2601) 收跌3%報26.95元；新華保險(1336) 下跌2.2%收造35.15元；中國太平(966) 收跌1.9%報15.68元。內銀股同現弱勢，工行(1398) 收挫1.5%報4.49元；民行(1988) 尾市錄得多筆大手「非自動對盤」成交，全日成交達19.44億元，為成交額第二多股份，僅次於騰訊(700) ，民行股價跌近1%收報8.14元，連跌9個交易日。
陸羽仁
金融High Tea 舊文
來源 source: http://hdfin.stheadline.com
