智取大市：
餐飲股變國情股
■有唔少飲食股已經成功賣殼，市傳連翠華都有人傾賣盤。 資料圖片
話說，Bar Pacific打算喺港交所上市，翻查呢間公司嘅上市文件，發現平均一間店舖，一個月只係賺2.5萬蚊，即係一間舖頭嘅盈利能力，原來同一個普通打工仔差唔多。有幫襯過呢間做街坊生意酒吧嘅
人都知，其實佢生意真係唔差，咁樣都賺咁少，可見香港飲食生意認真難做。
一盤辛辛苦苦經營嘅生意，畀租金食咗一大半，利潤增長潛力相當有限，當然換來唔高嘅估值。不過，近年有唔少飲食股上市，亦有唔少飲食股已經成功賣殼，因為內地有水喉射住。數嚇白欖先，譽宴（1483）、惟膳（8213）分別賣殼；富臨（1443）亦傳有復星同另一內地公司矽谷天堂爭購，而今年又有皇璽（8300）、利寶閣（8102）上咗市，Bar Pacific亦係緊隨其後，好似啤幾多都食得曬咁，唔理係主板定創板，一樣有人問津。連翠華（1314）都有人傾賣盤？其實，我都信信哋。
點解飲食股咁好食？皆因細細粒容易食，現成飲食企業又容易做到上市，業務簡單，偏偏會計賬目透明度又唔高，呢幾個因素，啱曬內地有錢佬胃口。因此，低市值飲食股的確有其留意價值，小注無妨。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
